- Publika iha: 22 Maio 2013
Uma lima ne’ebe governu harii ba veteranus sira iha distritu sira, liu-liu iha Distritu Liquisa agora dadaun veteranus sira la okupa maske konstrusaun remata kleur ona.
Tuir Deputadu Cesar Valente de Jesus katak uma hirak ne’e veteranus sira la okupa tanba medida uma ne’ebe ki’ik liu no la sufsiente para akumula membrus familia hotu hodi hela ba.
“Hau mos seidauk hare uma parte ne’ebe maibe veteran ida komandante Susar Lemorai mak informa katak nia la ba hela tanba uma ne’e medida la serve duni ba nia,” kestiona Deputadu Cesar Valente de Jesus, (04/04), iha Parlamentu Nasional.
Deputadu ne’e hatutan, uma lima ba veteranus sira ne’e governu harii desde tinan 2008 maibe veteranus sira la hela e sira hela deit iha sira nia uma privadu.
“Hau husu para governu responsabiliza ba sasan sira ne’e,” Deputadu ne’e sujere.
Entretantu Deputada Albina Marcal husu ba ministeriu kompetente tenke buka meius oinsa para uma sira ne’e labele abandona nune’e.
“Buka alternativa ne’ebe adekuada ba uma hirak ne’e, labele husik deit nune’e,” tenik Deputada Marcal.
Hatan ba preokupasaun ne’e Sekretariu Estadu Antigo Kombatentes da Libretasaun Nasional, Julio Sarmento da Costa alias Meta-Malik, katak uma hirak ne’e fo ona ba iha Ministeriu Solidairedade Sosial hodi entrega ba ema kbi’it la’ek sira atu hela.
“Foin dadauk hau ba iha Lopsalos,Ilomar hau hare uma 10 iha ne’eba maibe uma 10 ne’e mos inkondisaun teb-tebes,odamatan mos nakfera at hotu, janela mos laiha, tanba ne’e mak ami hanoin katak atu fo ba a kbi’it laek sira mak atu uja,” tenik SE Meta-Malik.
Kona ba karik governu iha planu atu harii tan uma ba veteranus sira ho kondisaun ne’ebe diak liu, SE Metan Malik dehan iha Orsamentu ba tinan 2013 nian l iha item ida ba planu ida ne’e.
“Planu ba 2014 nian ami seidauk diskuti maibe ami depois mak hare,hau labele hateten buat ruma antes tanba planu ba dezenvolvementu 2014 nian ami seidauk programa,” katak SE Metan Malik.