- Publika iha: 26 Fevereiro 2013
Iha diskusaun espesialidade ba Orsamentu Jeral du Estadu ano fiscal 2013 ne’ebe Komisaun Eventual sira hala’o ho tertutup, Reprezentante Sosiedade Sivil ne’ebe durante ne’e luta ba transparensia publiku konsidera iha informasaun balun mak komisaun subar ba publiku.Reprezentante Sosiedade Sivil Luta ba Transparensia Publiku, Remigio Laka dehan fatin atu halo diskusaun ba orsamentu mak iha sala plenaria Parlamentu Nasional, nune’e povu hotu bele asesu.
“La’os bolu malu iha kotuk-kotuk, depois sira koalia saida iha kotuk ne’eba, ami hanesan luta ba transparesnia publiku hanesan sosiedade sivil ami hare ba situasaun ida ne’e ladun justu ba ita hotu,” preokupa Reprezentante Sosiedade Sivil Luta ba Transparansia, Remigio Laka, iha Parlamentu, (11/02).
Karik ida ne’e tanba parlamentu nasional atu halo consensus politiku, tuir nia, la presiza taka ba publiku no tenke halo iha sala plenaria nune’e ema hotu bele asesu ba informasaun kona ba diskusaun ne’e.
Enkuantu membru Parlamentu Nasional ne’ebe involve iha Komisaun Eventual ne’e hamutuk Deputadus nain 20, diskusaun Komisaun Eventual durante loron tolu hahu dia 08 to’o 12 Fevereiru 2013.
Entretantu Deputadu Aurelio Freitas Ribeiro informa katak, objetivu diskusaun iha Komisaun Eventual mak atu hare fila-fali gastu orsamentu iha kada ministerius hodi halo consensus e ida ne’e tuir duni lei ne’ebe iha.
“Komisaun eventual ne’e atu hare fila-fali estrutura orsamentu ho consensus atu bele hadia, bele deminui balun, bele aumenta balun tuir nesesidade povu nian,” Deputadu Ribeiro esplika.
Iha diskusaun ne’e Komisaun Eventual, nia hatutan, la taka dalan ba Deputadu sira no fo oportunidade atu halo proposta alterasaun ruma para sira bele hare.
Alende ne’e Deputada Brigida Correia katak, Komisaun Eventual forma liu husi votasaun unaminidade iha Parlamentu.
“Tanba ita hare katak, iha esperiensia tinan lima liu ba katak,deputadu ida-idak mai ho ninia propostas, nia argumentus bele argumentus nebe ita hare katak balun akuza ema nia privadu,” esplika Deputada Correia.
Tanba ne’e mak parte opozisaun no bloku konkorda kria Komisaun Eventual ida para iha balansu hodi hare orsamentu jeral do estadu.
Deputada ne’e esplika, kuandu Komisaun Eventual ho Governu halo diskusaun proposta Orsamentu Jeral do Estadu mak pasa ona, bele fo sai deit rezulta no Parlamentu la presiza debate klean tan.
Alende ne’e Vise Prezidenti Parlamentu,Aderito Hugo informa katak,komisaun eventual la halo diskusaun iha Parlamentu tanba bankada hat iha Parlamentu hetan konsensus.
“Loos, ita bo’ot hatene katak diskusaun espesialidade tinan-tinan ba orsamentu sempre han tempu ba asuntus ne’ebe ki’ik oan tebe-tebes labele halo iha ne’eba,”hateten Vise PN ne’e.