- Publika iha: 18 Fevereiro 2013
MInisteriu Agrikultura no Peska sei hadia irigasaun lima iha distritu hirak ne’ebe durante ne’e la konsege hadia, nune’e bele hasa’e liu tan produsaun hare iha rai laran.Husi irigasaun lima ne’e, ba irigasaun Karau Ulun, Oe-Baba no ida tan iha Ainaro orsamentu aprova kedas iha tinan 2012, maibe seidauk halo tanba prosesu tenderizasaun iha sentral la’o neneik liu e tinan ne’e mak bele kontinua fali.
“Agora dadaun ami tau tan osan ba irigasaun ida iha Baguia no ida iha Tono Oe-Cusse, tanba prosesu ne’ebe maka bo’ot entaun tender ne’e iha sentral, ne’ebe buat ne’e la’o neneik maibe sei lao iha 2013 ne’e” dehan Ministru Mario Asanami Sabino, iha Kuartel Jeral F-FDTL, (02/02).
Ministru Asanami dehan, projeitu ne’ebe maka ho montante orsamentu $5 mil ba kraik ne’e iha distritu maka kaer, no husi $5 mil to’o iha 1 miliaun, ne’e iha ministeriu.
Enkuantu orsamentu ho montante $ um milioens, ba leten sentral iha Ajensia Dezenvolvementu Nasional (ADN), “ ne’ebe dalaruma obra balun la’o kleur oituan tanba prosesu mak hanesan ne’e,” dehan Ministru Asanami.
Iha lidun seluk Prezidente Komisaun D ne’ebe maka trata asuntu Ekonomia e Dezemvolvementu, Deputada Jacinta Abu Cau Pereira hateten, Governu presiza iha planu hanesan ne’e nune’e bele minimiza importasaun fos husi nasaun liur.
Deputada ne’e mos sujere ba MAP, atu fo uluk prioridade ba distritu ne’ebe iha potensial hodi produs hare barak.
“Hanesan ita hare iha distritu Viqueque, Maliana,no distritu Suai ne’ebe iha potensia maka’as ba produsaunn hare,” dehan Prezidente Komisaun D ne’e.
Husu ba atu halo evaluasaun kada tinan ba distritu ne’ebe mak hetan rezultadu diak (produs hare barak liu), nune’e ba distritu seluk ne’ebe ladun iha rezultadu Governu presiza tau atensaun hodi hadia kualidade de maneiras.