- Publika iha: 18 Fevereiro 2013
Konstrusaun Ospital Referal Baucau ne’ebe agora dadaun kontinua paradu, Membru Parlamentu Nasional eziji ba Ministerio Saúde atu rezolve lalais problema ida ne’e tanba kondisaun ospital tuan la favorese ona fo atendimentu ba pasiente. “Ami sei nafatin eziji ida ne’e tanba kondisaun ospital Baucau la favorese ona atu halo servisu kuandu tempu udan hanesan ne’e pasiente sira toba iha udan laran funsionario sira halai sai hotu tanba udan been tama iha sala laran,” preokupa Deputada Ilda Maria da Conçeicão, (01/02), iha Parlamentu Nasional.
Deputada ne’e afirma, problema ne’e akontese tanba governu fo projeitu barak ba kompania ida entau kompania laiha kapasidade finanseiru ne’ebe sufsiente atu halo konstrusaun ba projeitu sira ne’e hotu e ikus mai balun tenke paradu.
Prosesu konstrusaun ba Ospital Referal Baucau (ORB) ne’e hahu iha tinan 2010 kaer husi kompania ida husi Korea nian, maibe tanba kaer obra ne’e lahun la dikin, entaun fo fali ba kompania Ensul ne’ebe tuir lolos sei remata iha tinan ida ne’e maibe labele tanba konstrusaun seidauk atinji pursentu 30 bazeia ba fiskalizasaun ne’ebe komisaun F hala’o iha semana kotuk iha fatin ne’eba.
Iha parte seluk, Ministeriu Saúde rekonese duni problema ne’e maibe sira seidauk bele foti desizaun tanba sei hein desizaun husi Konselhu Ministru nian.
“Ami seidauk hala’o buat ida ami sei hein desizaun husi Konselhu Ministru nian foin ami bele halo buat ruma,” dehan Ministru Saude, Sergio Lobo.