- Publika iha: 18 Fevereiro 2013
Banku de Sangue Nasional agora dadaun desaraska ho stok ran ne’ebe limitadu tanba pasiente ne’ebe presiza ran aumenta.“Agora dadaun stok ran laiha, mamuk, ” dehan Xefe Unidade Banku de Sangue Nasional (BSN), Arsenio Jose Alves Guterres, (06/02), iha Bidau, Dili.
Nia hatutan, atu prepara ba kazu dengue, sira esforsu atu halo doasaun ba familia sira ne’ebe ho todan 55 ba leten no 60 kilo inklui livre husi moras infeksaun (HIV/SIDA, Hepatitis, Sipilis) sei hasai ran ho kuantidade 450 mili liter hodi prosesa atu halo separasaun ba ran trombosit (ran mutin) no ran mean.
Entretantu Membru Komisaun F ne’ebe trata asuntu Saúde, Edukasaun, Igualidade Jeneru, Deputada Maria Adozinda Pires da Silva hateten presiza toma atensaun husi Ministeriu Saude tanba ran ne’e importante hodi salva ema nia vida.
“Ami sei tenta koalia ho ministerio saúde hau hanoin ministerio iha osan ba kestaun sira ne’e maibe nia prosesu mak lao nei-neik, importante mak kontribuisaun husu familia pasiente sira,” dehan Deputada Pires.