- Publika iha: 08 Fevereiro 2013
“Ami hakarak hatene mos kualidade kombustivel tanba informasaun estudu balun hateten katak,ita nia kombustivel ladun diak,”dehan Deputadu Francisco Branco, (23/01), iha Parlamentu Nasional.
Deputadu ne’e dehan, peskiza ba distribuisaun kombustivel ne’e hala’o kleur ona maibe tanba iha interese balun la halo divulgasaun.
Tanba ne’e nia husu ba Ministeriu kompetente atu halo intervensaun lalais ba kualidade kombustivel sira ne’e, tanba kareta iha Timor barak liu mak kareta estadu nian. “Se la’e bele estraga lalais kareta,” Deputadu husi bankada Fretilin ne’e katak.
Entretantu Ministru Komersiu Industria e Ambiente (MKIA), Antonio da Conceicao hateten, defisil atu halo intervensaun tanba kombustivel sira ne’e mai husi rai liur (estranjeiru).
“Kontrola ba nia kuantidade ita sei bele halo tanba ida ne’e metrologia, ita iha ona ekipamentus atu halo sasukat ba nia kuantidade maibe kona ba kualidade ita labele tanba mina sira ne’e ita importa husi liur mai,” dehan Ministru MKIA ne’e.