- Publika iha: 08 Fevereiro 2013
Sekretariu Jeral Parlamentu Nasional informa katak,edifisiu foun Parlamentu Nasional ne’ebe atu harii iha Tasi tolu agora dadaun seidauk klaru tanba superior sira sei tetu hela kona ba fatin ne’e.“Ita sei hein atu kontinua ga oinsa,ita hotu-hotu hein desizaun husi superior sira,” hateten Sekretariu Jeral (SekJer) Parlamentu Nasional (PN),Joao Rui Amaral, (30/01), iha Parlamentu Nasional.
Tuir nia, asuntu ida ne’e dalabarak ona Prezidente PN levanta iha plenaria maibe to’o agora seidauk bele realiza tanba iha buat balun mak superior sira presiza tetu.
SekJer PN ne’e mos rezeita kona ba informasaun balun ne’ebe espaila katak parlamentu lansa ona primeira pedra ba edifisiu ne’e, ne’e la los.
“Informasaun ida ke la los,se dehan halo estudu de viabilidade kona ba fatin atu harii edifisiu ne’e los,” rejeita SekJer PN ne’e.
Orsamentu ba edifisiu foun ne’e preve ona desde iha Orsamentu Jeral Estadu 2010 nian ne’ebe agora sentraliza iha fundu infraestrutura nian, “se la sala 25 milioens hanesan ne’e,” tenik SekJer PN ne’e.
Iha fatin hanesan Deputadu Arao Noe sublina katak,planu atu harii edifisiu foun PN ne’e desde kedas iha primeira lejislatura to’o segundu lejislatura mos la realiza e to’o agora seidauk klaru kona ba fatin.
“Iha primeira lejislatura planu atu hari iha Hera, e iha segundu lejislatura atu hari iha Tasi tolu, iha Tasi-tolu ne’e iha dezenu rua,ida atu tasi-tolu laran,dezenu ida fali atu halo iha foho leten,” dehan deputadu Noe.
Nia dehan, preparasaun terenu halo tiha ona mais agora terseira lejislatura Prezidenti Parlamentu kontra oituan kona ba fatin ne’eba tanba ho razaun seguransa no kustu orsamentu.
“Orsamentu tama iha kapital infraestruturas,orsamentu ne’e la mate ne’e tranzita ba tinan oin mai tanba ne’e iha 2013 ita espera katak,rai fiksu ona no bele halo konstrusaun,” Deputadu ne’e esperansa.
Entretantu Deputadu Inacio Moreira espera katak iha mandatu terseira lejislatura ne’e bele identifika ona fatin fiksu nune’e bele hari ona edifisiu foun ne’e.
“Ita hein parlamentu terseira lejislatura ne’e bele iha hanoin halo nusa mak sira bele kontinua halo planu para edifikasaun ba parlamentu nasional,” Deputadu Moreira esperansa.
Deputadu husi bankada Fretilin ne’e mos husu atu edifisiu foun ne’e bele hari iha fatin ne’ebe ema hotu bele asesu.