- Publika iha: 26 Maio 2014
Sekretariu Estadu ba Komunikasaun Sosial (SEKOMS) iha ona planu atu haruka ka fasilita jornalista sira tuir formasaun iha Indonezia no Portugal iha tinan 2014 ne’e.
"Ita agora prepara hela ida ne'e, prepara hela fatin hodi tamping jornalista iha Indonezia bianhira sira to’o ba,” SE Nelio Isaac Sarmento hateten, iha Dili.
Sekretariu Estadu, hateten SEKOMS fasilita deit, maibe asosiasaun jornalista no media sira mak haruka sira nia jornalista.
“Formasaun hahu iha fulan Abril no Maiu nia laran, tanba ne’e ami koopera ho instituisaun media sira atu haruka sira nia ema mai, depois ami haruka ba,” SE Sarmento hateten.
Nia hateten, formasaun ida ne’e hanesan tulun ida husi governu liu husi SEKOMS hasa’e sira nia kapasidade hodi sira professional liu tan iha sira nia servisus.
Tuir plnau ne’ebe iha, nia dehan, iha tinan ida ne’e kursu formasaun ba jornalista sira sei dala rua ne'ebe sei presiza jornalista hamutuk nain 15 to'o 20.
"Hau nia planu tinan ida ne'e, pelomenus ita haruka treinamentu dala rua ho durasaun fulan tolu deit," Sarmento hateten.
Kona ba formasaun iha Portugal, nia dehan, seidauk hetan resposta husi Portugal, tanba Portugal rasik agora dadaun infrenta krizi ekonomia inklui iha klima malirin hela.
"Maibe imi tenke hatene Portugues, kuandu la hatene Portugues, imi la lika ba," nia dehan.
Iha sorin seluk reprezentante organizasaun Lao Hamutuk, Celestino Gusmao, kestiona kona ba papel lolos husi SEKOMS ne’ebe hakarak haruka jornalista ba tuir formasaun iha rai liur.
"Konselhu imprensa mak fo formasaun ba jornalista ga SEKOMS, hau husu ba sekretariu estadu nia pozisaun lolos," Gusmao husu.
Nia rekonese, katak formasaun ba jornalista importante, nune’e bele aumenta sira nia kapasidade, maibe lolos ne’e se mak iha kompetensia fo formasaun ba jornalista sira.
Iha parte seluk Deputadu Antonino Bianco, hateten formasaun ba jornalista ne'e importante tebes, atu oinsa mak eleva jornalista sira nia kapasidade.
"Ita kontinua fo formasaun para eleva ida-idak nia konesementu, atu nune'e sira bele hala’o husi loron ba loron sai diak liu tan,” Deputadu Bianco apoia.
Tanba ne'e, nia husu ba jornalista sira tenke aproveita oportunidade ida ne'e."Imi hanesan jornalista kualker formasaun ne'ebe eleva imi nia kapasidade ba partisipa deit, naran katak formasaun ne'e gratuita," nia enkoraja.