- Publika iha: 23 Maio 2014
Membru Parlamentu Nasional lamentavel ho kondisaun estrada diresaun distritu Aileu liga ba distritu Ainaro ne’ebe at total besik tinan 10 resin ona, maibe to’o agora seidauk rehabilita.
Membru Komisaun E (infra-estruturas, transportes no komunikasaun), Deputadu Inacio Moreira, hateten estrada hahu husi Aileu ba Ainaro ne’e at iha tinan barak ona, iha tinan kotuk governu promote ona atu halo iha tinan ne’e ida ne’e, maibe to’o oras ne’e dadaun seiduak iha sinal ida.
“To’o agora seidauk haree iha kompania ida komesa book Estrada ne’e,” Deputadu husi bankada Fretilin ne’e kestiona, iha Parlamentu Nasional.
Tanba ne’e nia dehan, sira nafatin ejiji no koalia asuntu ne’e iha Parlamentu Naisonal,to’o governu book estrada ne’e.
Iha tinan kotuk, nia dehan, Ministeriu Obras Publiku (MOP) halo ona imprestimu iha Banku Mundial atu halo estrada ne’e. “Maibe to’o agora seidauk halo buat ida,” nia dehan.
Entretantu Prezidente Asuntu Veteranus Distritu Ainaro, Jil da Costa Monteiro, hateten dalabarak ona sira nia parte ejiji ba lideransa sira ne’ebe vizita sira nia fatin inklui MOP rasik, maibe laiha rezultadu.
“Dalan mak at bebeik, pior liu kaundu udan ami la’o labele, la’o tauk monu,” Monteiro hateten.
Hatan ba preokupasaun ne’e Ministru Obras Publiku, Gastao de Souza, hateten estrada ne’e iha tempu badak iha tinan ida ne’e sei halo rehabilitasaun.
“Osan ba obra ne’e iha ona, hein atu implementa deit ona,” Ministru de Souza hateten.
Tanba ne’e, nia husu ba komunidade iha distritu Ainaro atu hein oituan, tanba prosesu la’o hela.