TMD Kontinua Julga Kazu Furtu Simples

Tribunal Munisipal Dili (TMD) kontinua julga kazu furtu simples (na’ok sasan) ne’ebe involve arguido MS ne’ebe na’ok vitima JL nia osan no sasan iha kios.

Tuir deklarasaun vitima iha tribunal, iha loron 24/04/2015, katak arguido MS mai dada lia ho vitima iha kios, la kleur vitima husu lisensa atu ba haris fatin no husu ajuda ba arguido atu hein kios.

Maibe wainhira vitima fila husi haris fatin, arguido laiha ona iha kios, mas vitima seidauk deskonfia katak arguido na’ok vitima nia osan, hafoin iha konsumidores ida mai sosa sigaru no vitima atu fo fila osan volta, haree iha gaveta osan laiha hotu.

“Hau haree osan por volta 30 dolar laiha, depois haree deho lima mak laiha no sagiko lata rua mak laiha, hau hakfodak,” vitima JL deklara iha tribunal, Dili.

Hafoin ne’e, vitima ba kedas iha arguido nia uma hodi husu tuir, maibe wainhira vitima to’o ba arguido laiha fatin.

Iha altura ne’eba wainhira arguido fila, vitima ba husu kedas, maibe arguido hirus vitima no atu baku fali vitima.

Nia dehan, tanba arguido hirus maka’as, entaun vitima sente tauk entaun nia fila tiha. Liu tiha loron ida arguido nia alin feto mai sosa sasan iha vitima nia kios, hodi dehan ba vitima katak “karik horseik hau nia bin mai deve iha ne’e karik, tanba nia lori deho no osan mai fo hau”.

“Hau hakfodak no hau langsung ba hato’o kedas keixa ba polisia,” vitima deklaran.

Iha fatin hanesan arguido mos fo nia depoitmentu ba tribunal hodi rekonese katak nia halo duni hahalok ne’e, tanba iha altura ne’eba osan laiha liu.

“Hau nia intensaun atu hatete, maibe hau hanoin karik nia la fo ne’ebe hau foti deit pois mak hau atu hatete,” arguido MS deklara.

Maibe, nia dehan, agora dadaun (iha julgamentu ne’e) nia pronto atu fo fila sasan no osan ne’ebe mak nia foti, no nia mos arepende e iha future nia sei la repete tan aktu hanesan.

“Hau konsiente, katak hahalok ne’e ladiak no hau pronto atu fo fila sasan ne’ebe mak hau konsege foti ona,” arguido hateten.

Hafoin rona tiha deklarasaun husi vitima no arguido, juis prezidente fo pena suspensaun tinan ida no husu atu arguido labele halo tan hahalok hanesan, se halo tan maka sei tama prizaun direitamente.