- Publika iha: 28 Abril 2016
Koordenadora Grupo Produtor Tais Feto Buka Rasik munisipio Bobonaro, Margarida Valente Cardoso, hateten sira nafatin uza material origin (kabas, ai tang, ai kakeu kulit no sabraka tahan) hodi produs tais.
Maske ohin loron mosu kabas importa barak, maibe nia dehan, sira hakarak uza kabas ne’ebe tein rasik, tanba nia kualidade diak liu no tais original ne’e mai husi kedas bei ala sira.
“Ami kuda rasik kabas no tein ai kulit/tahan sira halo koor, e ida ne’e mak ita nia kultura halo tais original no kultura ida ne’e bei ala sira hanorin hela ba ita,” Cardoso hateten, hafoin halo demontrasaun iha edifisio Fundasaun Alola, Dili.
Atu produs tais bo’ot ida, nia esplika, presiza fulan lima hahu husi koileta kabas to’o remata.
Nia dehan, prosesu atu hetan kabas (pronto) ida, primeiru sira koileta kabas iha to’os, habai maran tiha no lori ai dedun hodi hasai kabas nia musan.
Depois tii (halo ki’ik), hurun tiha kabas ne’e no tein ai kakeu nia kulit kahur ho ai tang tahan, derok, malus tahan hodi halo koor.
Iha parte seluk Koordenador Hakbi’it Ekonomia Feto Fundasaun Alola, Jose Sabino, enkoraja nafatin grupo feto sira atu mantein ho kabas no koor origin ne’ebe iha hodi produs tais, tanba valor ekonomiku bo’ot tebes kompara ho kabas importasaun.
Nia dehan, iha grupo barak mak uza kabas no koor importasaun sira hodi produs tais, maibe laiha kualidade no valor ekonomiku ki’ik kompara ho sasan origin sira.
“Maske lori tempu naruk atu hetan tais ida maibe nia valor diak tebes iha merkadu, tanba ema barak gosta sosa sasan ne’ebe origin la uza sasan importasaun,” nia hateten.
Husi grupo 50 resin ne’ebe sira fo kapasitasaun, nia dehan, iha grupo 32 mak mantein ho sasan origin hodi produs tais maibe iha barak mos uza kabas importa sira.