- Publika iha: 20 Abril 2016
Arguido TF halo agregasaun fiziku tuku no tebes lezada TM ( feto ho moras mental) tanba TM tama ba arguido nia uma laran hodi tuda rahun arguido nia televizaun.
Tuir akuzasaun Ministeriu Publiku ne’ebe lee sai husi juis prezidente, katak iha dia 15 Marsu 2015, maizumenus tuku hat lokraik, wainhira arguido nonton hela, derpente lezada tama ba arguido nia uma laran hodi lori fatuk ki’ik hodi tuda arguido nia televizaun, maibe televizaun ne’e la konsege rahun ida.
Maibe tanba nervozu, arguido halai tuir lezada TM no dada lezada nia fuuk hodi lezada monu ba rai, depois arguido tebe lezada no wainhira lezada hamrik arguido tuku fali lezada nia kotuk laran.
Hafoin lee sai akuzasaun hirak ne’e, juis prezidente husu ba arguido hato’o nia deklarasaun mai tribunal, no iha altura ne’eba arguido konsege deklara ba tribunal katak nia halo hahalok ne’e tanba nervozu.
“Hau hakfodak no nervozu, maibe wainhira hau baku tiha hau arepende,” deklara arguido iha tribunal.
Maibe depois de akontesementu ne’e arguido koko ona ba husu diskulpa ba familia tomak husi parte lezada nian, no halo tratamentu ba lezada no agora dadaun lezada no arguido diak malu ona.
Iha fatin hanesan juis mos husu ba testamunha (MJ), maibe iha tempu hanesan nudar mos alin husi lezada hodi hato’o nia deklarasaun mai tribunal, no iha altura ne’eba MJ, hateten arguido baku no tebe duni lezada to’o lezada moras loron ida, maibe arguido konsege ba husu diskulpa no lori lezada ba Ospital Nasional Guido Valadares (HNGV) hodi halo tratamentu.
“Nia husu diskulpa no fo apoiu moral ba hau nia bin,” nia deklara.
Iha opportunidade hanesan, nia husu, ba arguido atu komprende lezada tanba nia ho kondisaun la normal.
Hafoin rona tiha deklarasaun husi arguido no lezada, juis prezidente deside fo pena suspensaun ba arguido no husu ba arguido atu labele repete tan aktu hanesan, sekuandu halo tan maka sei tama prizaun direitamente.