Terça, Maio 21, 2024
Total visitors: 766366

Diretora Ezekutiva Hospital Referensia (HR) Maubisse, Doutora Gabriela Pereira hateten total forsa servisu iha ospitál hamutuk na’in 129, kompostu husi nasionál na’in 119 no brigada Cuba na’in 10. Maibé na’in 25 husi 119 ne’e kontratadu, ne’ebé mandatu sei termina iha loron 31 fulan-dezembru tinan 2023.

Diretora Ezekutiva Hospital Referensia (HR) Maubisse, Doutora Gabriela Pereira hateten total forsa servisu iha ospitál hamutuk na’in 129, kompostu husi nasionál na’in 119 no brigada Cuba na’in 10.

Nia dehan númeru forsa traballu ne’ebé iha la sufisiente tanba ne’e, Ministériu Saúde tenke tau iha konsiderasaun atu kontinua kontratu profisionál saúde na’in 25 ne’e hodi hala’o servisu iha ospitál.

“Ita sei haruka karta ba nai-ulun sira iha Ministériu Saúde atu iha kontinuasaun, tanba ita hapara sira-nia kontratu ita menus rekursu umanu halo servisu iha hospital,” nia hateten bainhira partisipa iha workshop konsultasaun nasionál polítika jestaun lixu kuidadus saúde no polítika no estratejia fasilidade kuidadu saúde resiliente ba klima no ambiente sustentável, iha ótel Novu Turismu Lesidere, Díli.

Nia hateten kontratadu sira-ne’e, kompostu husi médiku jeral, parteira, enfermeira/u, tékniku aliadu, nutritionista, tékniku biomedical atu hadia ekipamentu médiku sira ne’ebé avaria inklui pesoal ne’ebé kaer programa HIV/SIDA.

Nia konsiente bazeia ba mapamentu, forsa servisu ne’ebé iha seidauk kompletu atu prense unidade sira hotu no halo rotasaun servisu. Maibé sira halo esforsu atu halo jestaun didi’ak ba utilizasaun rekursu ne’ebé iha hodi halo tratamentu saúde.

Nia hatutan brigada Cubanu ne’ebé servisu iha ospitál na’in 10, kompostu husi médiku espesialista na’in haat, médiku jeral na’in rua, tékniku anastesia na’in tolu, tékniku ultrasonografia no tékniku balun tan apoia iha sala operasaun nian.

Iha parte seluk, Membru Parlamentu Nasionál, Deputada Luis Roberto husu Ministériu Saúde atu konsidera destinu forsa servisu sira-ne’e nian, tanba sira hala’o servisu besik tinan lima ona.

“Informasaun ne’ebé ha’u rona husi kolega sira, fulan-dezembru agora sira-nia kontratu termina ona, signifika sira sai husi servisu. Ida ne’e afeta ba atendimentu públiku iha ospitál, tanba ita-nia númeru rekursu umanu menus atendimentu la’o la di’ak,” nia hateten.

Nia sujere ba Ministériu Saúde atu rekruta funsionáriu permanente servisu iha ospitál sira fó oportunidade ba profisionál saúde sira ne’ebé hala’o servisu tinan haat resin ona, tanba sira hatene ona sistema servisu.