Komandu F-FDTL Haruka Membru Nain Rua Ba Apoiu Misaun ONU

Komandu Falintil Forsa Defesa Timor-Leste (F-FDTL) haruka membru nain rua husi Komponente Terestre ba apoiu misaun paz ONU iha Sudao do Sul.

Xefe Estadu Maior Jeneral F-FDTL, Tenente Jerenal Domingos Raul Falur Rate Laek dehan, membru nain rua ne’ebe mak komandu haruka ba apoiu misaun ONU ne’e treinadu no preparadu no sira hatene saida mak sira sei halo durante operasaun iha Sudao do Sul.

“Ita nia membru nain rua ne’ebe ita haruka ba apoiu misaun ONU ne’e ohin sira hahu halo ona sira nia misaun iha Sudao do Sul,” nia informa iha knar fatin Fatuhada, Dili.

Nia dehan, membru nain rua ne’e hala’o misaun iha ONU, no partisipa ho kontijente ne’ebe kiik.

“Ita rekonhese katak ita nia partisipasaun forsa iha ONU ne’e seidauk barak, tanba ne’e oportunidade ne’ebe mak Nova Yorke fo ita labele husik liu ida, haruka rua mos ita tenke partisipa,” Tenente Jeneral Falur dehan.

Nia dehan, membru nain rua refere iha area mediku, enegenaria no informasaun, bazeia ba pedidu ne’ebe mak komisaun misaun paz ONU haruka mai komandu F-FDTL.

Iha parte seluk Diretor Fundasaun Mahein (FM), Abel Martins, dehan membru F-FDTL nain rua ne’ebe mak hetan fiar husi komandu hodi ba apoiu misaun paz iha ONU ne’e lori Timor nia naran no F-FDTL mak ba halo misaun iha Sudao do Sul tanba ne’e husu atu servisu ho profesionalismo nune’e bele lori benefisiu diak mai Timor-Leste.

“Misaun ne’ebe mak membru nain rua ba hala’o ne’e la’os fasil maibe defisil tanba ne’e presija servisu ho vontade diak nune’e mos hatudu profesionalismu hodi hamorin F-FDTL nia naran iha mundu internasional liu husi misaun ne’ebe imi hala’o,” Diretor Martins dehan.

Maibe nia dehan, F-FDTL ba apoiu misaun paz ONU ne’e ida ne’e la’os primeiru maibe iha tinan kotuk mos sira ba partisipa ona misaun paz iha Libano.