- Publika iha: 04 Maio 2021
Polisia Nasional Timor-Leste (PNTL) pronto asegura implementasaun konfinamentu domisiliariu obrigatoriu iha kapital Dili laran ho regras ne’ebe rigoroju, hodi halo prevensaun ba transmisaun Covid-19 iha Dili.
Komandante Jeral PNTL, Comisario Faustinho da Costa hateten, virus corona ne’e laos daet deit iha Timor-Leste maibe afeta mos ba mundu no Timor mos numeru kazu aumenta, no governu dekreta ona rezolusaun hodi implementa konfinamentu domilisiariu iha kapital Dili no bandu aktividade hotu.
“Iha implementasaun konfinamentu doimisiliariu jeral iha Dili ne’e ema hotu sei hela deit iha uma no labele sai bainhira la iha nesesidade urijente sira, se lae polisia sei atua ho rigoroju,” Komisariu PNTL Costa dehan.
Nia dehan, movimentu ne’ebe mak autoriza mak hanesan, asesu ba loja, hospital sira tuir rezolusaun ne’ebe mak fo sai ona no ba trabalhador sira husi kompanhia tenke iha surat autorizasaun movimentu nian, nune’e bainhira halo movimentu labele hetan inpedimentu husi parte seguransa.
“Konfinamentu dolmisiariu jeral iha kapital Dili ne’e hodi evita hadaet covid-19 ema ida ho ema seluk, hela iha uma fase liman bei-beik, tenke mantein distansiamentu social no uza maskra bainhira atu sai ba fatin ruma,” nia hateten.
Tanba ne’e nia dehan, implementasaun konfinamentu ne’ebe mak polisia aplika ne’e, bazeia ba rezolusaun ne’ebe mak governu fo sai ona tanba ne’e ba komunidade ne’ebe mak la kumpri polisia sei foti medida rigoroju no kriminaliza hodi aprezenta ba ministeriu publiku tanba komente krime desobidensia.
Entertantu, Komandante Polisia Munisipiu Dili Superientendente Xefe Henrique da Costa hateten opeasaun konaba implementasaun konfinamentu domisiliariu jeral iha Dili laran komandu Dili hahu orienta ona membru sira hodi halo atuasaun iha dalan publiku.
“Iha dalan publiku sira iha Dili laran ita koloka membru kada ekipa nain haat (4) hodi kontrola movimentu komunidade nian,” nia dehan.
Nia dehan, rezolusaun ne’ebe mak governu aprova ne’e hodi eduka komunidade sira liu-liu iha Dili hodi bele prevene an husi corona virus.
“Tanba ne’e ba komunidade se deit mak la kumpri ita sei foti medida tuir lei ne’ebe mak vigor ona hodi prosesu tuir dalan legal,” Komandante Dili Costa informa.
Tanba ne’e husu ba komunidade hotu tenke kumpri no hela hakametek iha uma, fase liman nafatin uza maskara no mantein distansiamentu social ho ema seluk nune’e bele kiuntribui ba prevensaun.