Labaraik Na’in 18 Fokupers Asegura Iha Uma Mahon

Labaraik na’in 18 dadaun ne’e organizasaun Non-Governamentál Fokupes asegura hela iha uma mahon Crece Knua tanba sai vítima ba kazu violénsia sira ne’ebé akontese iha territóriu laran.

Koordenadora Crece Knua ba Labarik, Mercia Lopes, hatete labarik sai vítima ba kazu violénsia hanesan, violénsia seksuál, abuzu seksuál, violénsia doméstika, fizika no violénsia oi-oin seluk.

“Ami asegura hela labarik hamutuk na’in 18 iha uma mahon atu nune’e bele hetan asisténsia,” nia hatete.

Nia dehan, labarik hirak ne’e ho idade hahú husi tinan 2 to’o 17 mak durante ne’e sai vítima ba kazu violénsia sira husi inan-aman nune’e mós família no ema seluk tuir dadus ne’ebé rejistu.

“Vítima hirak ne’e ita asegura hela iha uma mahon hodi hein prosesu iha tribunal, no vítima hirak ne’e nafatin asesu ba edukasaun, maibé ita nia alin ne’ebé mak ho idade 15 no 17 gravida hela, labele eskola tanba sira moe. Bainhira partu tiha ita fasilita sira kontinua eskola fali,” Koordenadora Fokupers Lopes dehan.

Nia dehan, iha uma mahon Fokupers iha atividade terapia no akonsellamentu ba labarik sira, fo asisténsia ba sira-nia fiziku katak sira tenke iha psikolojia ne’ebé di‘ak.

“Atividade hirak ne’e ami realiza ho objetivu hodi kura sira sai di’ak,” nia dehan.

Enkuantu nia dehan, bainhira prosesu hotu la’o di’ak no arguidu tama ona prizaun, entaun uma mahon reintegra fali labarik sira-ne’e ba nia família, maibé molok reintegra sei halo uluk avaliasaun ba nia família katak fatin seguru no di’ak mak hafoin integra.

Entretantu Xefe suku Kaikoli Hipolitu Sarmento dehan, iha suku Kaikoli rasik durante ne’e seidauk akontese kazu violasaun hasoru labaraik sira.

Nia dehan, atu halo prevensaun ba kazu violénsia hasoru labarik sira tenke implementa projetu lei protesaun labarik no joven sira atu nune’e kontrola di’ak liu tan.

“Ita agradese tanba lei ne’e hetan aprovasaun hosi Parlamentu Nasional maibé oinsa mak sosiedade sivíl no governu nia papél atu bele implemeta ho sériu,” nia dehan iha Kaikoli.

Tanba ne’e nia dehan, lei ne’e nia vantajen boot ba Fokupers oinsa atu haree ba violénsia ne’ebé akontese ba labarik sira iha eskola no iha komunidade.