- Publika iha: 22 Abril 2022
Governo Timor-Leste liu husi Sekretaria Estado Formasaun Profesional no Emprego (SEFOPE) haruka tan trabalhador hamutuk 75 ba servisu iha Corea do Sul.
Diretor Nasional Empregu Exterior, Filomeno Soares, agradese tebes ba governo Korea tanba kuntinua simu nafatin Timoroan sira hodi ba servisu iha nasaun refere hodi redus numero dezemprego iha Timor-Leste.
"Husi governo Korea nia tulun liu koperasaun Sekretario Estado Formasaun Emprego no Profesional (SEFOPE) hodi kria kampu servisu ba joven sira hodi hamenus degemprego no hasa'e kresento ekonomiku iha Timor," nia salienta.
Tanba ne'e nia dehan, liu husi koperasaun servisu kuntinua tanba ne'e mak governo foin haruka tan trabalhador hamutuk nain 75 ba servisu iha Corea do Sul.
"Husi trabalhador nain 75 ne'e, hotu ba servisu iha area rua kompostu husi fabrika nain 41 no peska nain 34," DNEX Soares hateten.
Tanba ne'e nia husu ba trabalhador sira atu hatudu komportamentu serbisu diak no labele halai ses hosi sistema, nune’e empregador sira bele fo tan serbisu ba joven Timoroan sira ne’ebe presiza servisu.
"Ita husu mos atu servisu kuidado an nune'e bele fila mai Timor ho saude ne'ebe mak diak hodi kontribui ba dezenvolvento nasional liu husi esperiensia ne'ebe mak imi hetan," nia salienta.
Entretanto, Prezidente Komisaun E, iha Parlamentu Nasional, ne’ebe trata Asuntu Ekonomia no Dezenvolvimentu, Deputadu Antonino Bianco, hateten trabalhador Timoroan sira ne'ebe servisu iha Corea ne'e lori susesu ne'ebe signifika tebes mai governu Timor-Leste.
"Ita konsidera trabalhador Timoroan ne'ebe servisu iha Corea ne'e tanba liu husi esforsu makas governo nian nune'e hodi fo oportunidade ba joven sira," nia hateten.
Tanba ne'e husu trabalhador sira tenke fo responsabilidade maximu ba servisu, maibe tenke akompanha ho orasaun nune'e mos responsabilidade moral tanba ne’e tenke ba servisu ho kuidadu an iha ema nia rai.