Polisia Reforsa Seguransa Hodi Kontrola Grupu Arte Marsiais

Polisia Komandu Munisipiu Dili reforsa seguransa hodi kontrola movimentu grupu arte marsiais iha kapital Dili durante 24 oras.

Segundu Komandante Polisia Munisipiu Dili, Superientendente Joao Sancho Pires, hateten liga ba kazu konfrontasaun sira ne’ebe akontese iha Dili husi grupu arte marsiais iha tempu kalan komandu orienta ona reforsa seguransa hodi halo kontrolu.

“Ita reforsa ona operasaun kontrolu hodi kontrola movimentu grupu arte marsiais nune’e mos minimiza kazu krimi iha kapital Dili,” Superientendente Sancho hateten.

Tanba ne’e nia dehan, diak liu membru grupu arte marsiais sira tu’ur hakmatek iha uma no labele koko provoka situasaun.

“Ita husu atu ita nia joventude sira ne’ebe mak involve iha arte marsiais sira, atu unidade tempu ida agora ne’e laos atu kria problema maibe tenke buka hatene oinsa moris diak iha futuru oin main,” nia dehan.

Alende ne’e nia dehan, komandu hatun ona orientasaun ba Ofisial Polisia Suku (OPS) no autoridade lokal sira karik identifika membru grupu arte marsiais balun trenu iha suku ka aldeia laran tenke informa ba polisia nune’e polisia bele halo atuasaun.

“Ita sei la fo livre ba grupu arti marsiais sira atu halo treinu ka halo movimentu ho intensaun atu halo krimi ne’e ita sei la tolera,” nia salienta.

Alende ne’e apela ba sidadaun hotu atu kumpri regras ne’ebe guverno, liu hosi Ministeriu Saude fo sai, nune’e bele halo prevensaun ba virus variante foun ne’ebe dadaun ne’e afeta ona iha Indonezia.

Entretantu, Diretor Ezekutivu Fundasaun Mahein (FM), Joao Almedia, hateten dadaun ne’e kazu krimi komesa akontese fali ona, tanba ne’e husu polisia tenke halo atuasaun ne’ebe mak rigorusu nune’e bele minimiza konflitu iha Dili.

“Durante fulan hira ne’e kazu krimi la akontese, maibe iha fulan julhu ne’e komesa fali ona kazu krimi, ne’ebe akontese iha bairu sira,” nia hateten.

Tanba ne’e atu redus kazu krimi, vizibilidade polisia iha fatin publiku ne’e importante no mos iha bairu sira, labele hein problema akontese mak polisia foin tun, maibe prezensa polisia iha komunidade ne’e importante ba kontribuisaun prevensaun krimi.