- Publika iha: 02 Fevereiro 2023
Iha ámbitu asembleia jerál membru Forum NGO Timor-Leste (FONGTIL), Diretór Ezekutivu FONGTIL, Valentim da Costa Pinto afirma sosiedade sivíl nia pozisaun nu’udar parseru governu nian ne’ebé krítiku, síviku no solidaridade hodi hametin dezenvolvimentu nasionál ne’ebé inkluzivu no sustentabilidade.
Nia salienta kada tinan-lima membru FONGTIL realiza asembleia jerál atu halo apresiasaun servisu sira, diskute estatutu FONGTIL nian ba ezisténsia tinan lima oin mai no halo mós nomeasaun no votasaun ba membru konsellu fiskál atu hala’o knaar ba mandatu haat ne’ebé FONGTIL halo, liu-liu asegura informasaun, hametin koordenasaun, servisu advokasia no harii kapasidade.
“Ami-nia membru sira-ne’e atividade oioin, barak liu iha servisu advokasia no atividade umanitária nian ne’ebé halo servisu besik liu ho grupu tarjetu sira hanesan grupu feto, ema ho defisiénsia iha baze,” nia hateten hafoin partisipa iha asembleia jerál membru FONGTIL tinan 2022, ho tema “Hamutuk ita asegura sosiedade ida krítiku, síviku no solidaridade hodi hametin dezenvolvimentu nasionál ne’ebé inkluzivu no sustentável iha salaun Catedral Vila Verde, Díli.
Nia hateten dadaun ne’e iha organizasaun membru balun ne’ebé hetan apoia husi Servisu Apoia Sosiedade Sivíl no Auditoria Sosiál (SASCAS), ne’ebé halo peskiza foku ba setór prinsipál haat mak edukasaun, saúde, agrikultura no infrastrutura bázika.
Nia informa dadaun ne’e iha organizasaun membru ativu hamutuk 225. No iha asembleia jerál tinan 2022, aprova tan proposta membru foun hamutuk 27 husi organizasaun lokál no NGO internasionál 22.
Iha parte seluk, Diretór Ezekutivu SASCAS, Edrin Duarte Soares Noronha hateten tinan ida-ne’e (2023) sira prevé orsamentu ho montante millaunU$1.5 hodi apoia organizasaun sosiedade sivíl sira hamutuk 191.
Nia dehan organizasaun sira-ne’e kompostu husi organizasaun sosiedade sivíl NGO, asosiasaun, fundasaun, grupu komunidade báziku, organizasaun rezisténsia no konfisaun relijiozu non katólika sira.
“Servisu ne’ebé presta husi sosiedade sivíl ne’e multi-integradu tebes tanba ita bo’ot sira haree organizasaun lubun halo servisu iha hortikultura, pekuária, agrikultura, formasaun sira, entaun ami labele dehan balun susesu tanba kuaze hotu la’o di’ak,” nia hateten.
Nia dehan tinan ida-ne’e sira mós prevé orsamentu millaun U$1.3 atu halo konstrusaun ba monumentu saudozu Prezidente Francisco Xavier iha postu Administrativu Turiskai, munisípiu Manufahi.