- Publika iha: 22 Dezembro 2021
Iha ambitu selebrasaun Tais Timor hetan rekonhesementu husi UNESCO Paris hanesan patrimonio kultural imaterial ba salvaguarda urjente, Primeru Ministru Taur Matan Ruak enkoraja soru nain sira atu transforma konhesementu ba jerasaun foun sira atu kontinua pratika soru tais ba futuru.
Nia dehan tais iha valor sosio-kultural no ekonomia bo’ot tebes ba sosiedade no rai Timor tanba nia utilidade barak loos hahu husi simu bainaka, serimonia tradisaun sira to’o iha mate mos presiza tais.
“Iha ita nia sosiedade ita nia kultura tais ne’e importante loos, nia iha valor kultura ida bo’ot tebes ba ita no ita nia rai. Entaun rekonhesementu ida ne’e, ba ita momentu ida ita simu ho orgulho tebes. Ita nunka espera momentu ida ne’e bele to’o,” nia hateten hafoin partisipa iha serimonia dada lia ho media konaba rekonhesementu tais timor husi UNESCO hanesan patrimonio kultural e material internasional iha salaun Suai room Timor Plaza, Dili.
Nia hateten governu promote atu kontinua servisu hamutuk ho organizasaun intersadu sira suporta inan feto sira ne’ebe didika sira nia tempu ba soru tais.
Nia rekonhese jerasaun foun sira agora lahatene soru tais tanba ne’e tenke habelar konhesementu ne’e ba jerasaun foun sira valoriza no hatutan atu labele lakon.
Iha oportunidade ne’e nia hato’o agradesementu ba parseriu dezenvolvimentu sira hanesan UNESCO, USAID, UN Women no organizasaun sosiedade sivil Fundasaun Alola, Timor Aid ne’ebe halo servisu makas hodi tais timor hetan rekonhesementu mundial.
Enkuantu, soru nain husi grupo Halibur Feto, iha Munisipiu Ainaro, Rosita Doutel Sarmento hateten sira pontu atu partisipa iha atividade ne’ebe governu promove hodi transforma konhesementu ba jerasaun foun sira.
“Ami prontu atu tuir, se karik governu presiza ami,” nia hateten.
Nia informa durante ne’e tais ne’ebe sira soru faan deit iha uma, bainhira laiha atividade feira tanba ne’e la enkoraja sira atu halao atividade ida ne’e.
Iha parte seluk, Enkaregadu Negósiu Embaixada Estadus Unidus, Tom Daley hateten kontente tais Timoroan nian hetan ona rekonhesementu mundial hanesan patrimonio kultural imaterial.
“Ami espera katak rekonhesementu internasional ne’e sei aumetna liu tan ema nia interese ba halo tais no ba Timor-Leste, ne’ebe bele ajuda familia sira nia moris iha timor laran tomak no jerasaun sira tuir mai,” nia hateten.
Nia dehan sira prontu apoia governu liu husi agensia USAID nia projeitu Turismu ba Ema Hotu atu halao atividade sira protese no promove tais timor, liu-liu hasa’e konhesementu ema nian konaba valor tais no enkoraja foinsa’e sira aprende halo tais.