- Publika iha: 10 Setembro 2021
Diretor Nasional Empregu Exterior (DNEE), Iha Sekretariu Estadu Formasaun Profisional no Empregu (SEFOPE), husu trabalhador Timoroan hamutuk nain 300 iha Australia bele fila ona mai Timor tanba sira nia kontratu hotu ona, no sai ona husi sistema.
Diretor DNEE, Filomeno Soares, hateten trabalhador hirak ne'e sira nia kontratu hotu durante fulan sia ona no kompanhia labele prolonga sira nia kontratu tanba situasaun Covid-19 osan la iha hodi selu trabalhasor sira.
"Ita husu sira atu bele fila tanba sira iha ne'eba mos la iha osan hodi selu alojamentu nune'e mos nesesidade lor-loron nian," nia dehan.
Nia hateten, sira nai 300 ne'e tenke fila nune'e labele prejudika fali sira seluk ne'ebe mak iha sistema ne'e nia servisu.
"Dadaun ne'e ita kopera hamutuk ho Ministeriu Negosiu Esttanjeriu hodi rezolve problema ne'e no hodi haruka fila trabalhador sira mai Timor," nia salienta.
Alende ne'e, nia dehan husi trabalhador nain 300 ne'e iha 156 mak sai husi sistema hodi trata visa protesaun husi governu Australia.
"Maibe ami nia ekipa no adidu iha Darwin nafatin kontrola no mobiliza trabalhador sira nafatin no fo konsolamentu no kontrola sira nia vida moris iha Australia to'o bainhira sira fila mai Timor," DNEE Soares informa.
Entretantu, Deputadu Mariano Asanami Sabino hateten, governu Timor-Leste iha responsabilidade bo'ot ba problema sira ne'ebe trabalhador sira hasoru iha nasaun estranjeiru, no governu tenke buka solusaun hodi trata sira ho dingu no lori sira fila mai Timor.
"Governu tenke buka solusaun hodi rezolve pozisaun ita nia trabalhador nain 300 ne'e tanba sai ona husi sistema ne'e signifika ilegal ona tanba ne'e tenke proteje sira," Deputadu Sabino hateten iha Parlamentu Nasional.