- Publika iha: 27 Julho 2020
Assistente Reprezentante Agensia United Nations Population Fund (UNFPA), Doutora Domingas Bernardo hateten tinan ida ne’e 2020, sira aloka orsamentu ho montante $400,000 hodi sosa medikamentu no ekipamentu planeamentu familia nian, liu-liu kontrasepsaun sira hodi apoia servisu atendimentu saúde inan iha rai laran.
Nia salienta, kada tinan sira tau osan proprio hodi sosa komoditas planeamentu familia nian ba Timor-Leste, maibe utilizasaun ladun maximu tanba medikamentu no ekipamentu ne’ebe nia prazu uza hotu ona.
“Ohin asina akordu sumbrinha ida atu formaliza servisu hamutuk entre UNFPA no SAMES atu asegura jestaun armazena ba medikamentu no ekipamentu komoditas planeamentu familia nian atu labele iha stok out,” nia hateten hafoin asina akordu servisu hamutuk ho SAMES iha Kampung Alor, Dili.
Nia haktuir, medikamentu no ekipamentu sira ne’e balun to’o ona iha armazen nasional no balun sei iha prosesu transportasaun tanba produtu sira ne’e sosa iha nasaun Dinamarka.
Nia haktuir, iha akordu refere sei foku liu ba kapasitasaun ba tekniku sira kona-ba utilizasaun sistema elektronika armajenamentu medikamentu no ekipamentu tanba sei introdus sistema elektronika no mekanismu destruisaun ba medikamentu no ekipamentu komoditas planeamentu familia nian.
Nia hatutan medikamentu no ekipamentu komoditas planeamentu familia nian ne’e kontein hormonal ne’ebé bele estraga ambiente tanba ne’e importante tekniku sira hatene meus halo destruisaun ne’ebe la estraga ambiente.
Dadus peskiza Demografia no Saúde (DHS) 2016, hatudu 24% feto kabenain sira uza metodu kontrasepsaun modernu hanesan hemu pil, IUD, Impla, maibe maioria 12% sona ka injeksaun. No 25% feto kaben nain la asesu ba atendimentu planeamentu familia.
Iha parte seluk, Diretora Executivu Servisu Autonomia Medikamentu no Ekipamentu Saúde (SAMES), Santana Martins hateten akordu ne’e atu hametin liu tan servisu hamutuk entre UNFPA no SAMES tanba UNFPA mak durante ne’e apoia medikamentu no ekipamentu planeamentu familiar.
“Siklu kompras medikamentu no ekipamentu planeamentu familiar ne’e estavel tanba planeamentu fisku, kalendario fiksu, no orsamentu fiksu, entau prosesu akizisaun sira la hein hanesan sistema Timor nian ne’ebe lei jestaun finanseiru hateten iha orsamentu mak foin halo aprovizionamentu,” nia hateten.
Nia dehan agensia ONU sira uza sistema orsamentu ba medikamentu no ekipamentu ne’e aloka multianual tanba ne’e kualker tempu aimoruk stok fulan neen besik remata halo fali ona akizasaun, maibe sistema iha Timor osan aloka dala ida deit sosa hotu dala ida stok menus osan laiha ona atu sosa.
Nia informa, medikamentu no ekipamentu planeamentu familia disponivel iha armajen tanba stok balun tama ona no agora halo distribuisaun ba fasilidade saúde sira.