Kualidade Edukasaun Monu Afeta Futuru Nasaun

Reitor Universidade Nasional Timor Lorosa’e (UNTL), Dr. João Soares Martins hateten pandemia Covid-19 lori konsekuensia negativa makas tebes ba kualidade edukasaun iha rai laran tanba laiha kondisaun seluk atu rekupera prosesu aprendijajen. No kondisaun ne’e sei afeta futuru nasaun nian.

Nia salienta, mundu ohin loron digitalizasaun, maibe iha Timor-Leste laiha esperansa tanba kompanhia telekomunikasaun sira la iha kapasidade atu fasilita prosesesu estudu online. Entaun tinan ida resin atividade eskola tantu nivel ensinu primaria to’o superior suspende.

“Situasaun ne’e perigu tebes ita labele husik mantein situasaun ne’e tanba nasaun Timor-Leste sei lakon oportunidade tanba ita lakon tinan rua atu ba tolu, ne’e sei afeta future nasaun nian. Kualidade formasaun sei monu, aban bairua sira termina kursu ita la espera kualidade ne’ebe ita hakarak atu servi nasaun tanba enves sira sai formadu ne’ebe bein formad, maibe sai formadu online ne’ebe sei la ajuda ita,” nia hateten hafoin partisipa iha serimonia lansamentu kampanha vasinasaun Sinovac iha kampus UNTL, Dili.

Nia dehan durante period estado emergensia, serka sanitaria no konfinamentu obrigatoriu, sira halo esforsu atu rekupera ho fasilidade online, maibe kompanha telekomunikasaun sira la ajuda.

Iha oportunidade ne’e nia apela ba komunidade akademika sira husi nivel hotu tantu privado no publiku atu hakbesik aan ba postu vasinasaun sira hodi simu vasina tanba wainhira ema hotu simu ona vasina maka iha posibilidade bo’ot bele komesa fila fali aula prezensiais ne’ebe ema hotu hein hela.

Iha parte seluk, Ministru Ensinu Superior, Siensia no Kultura (MESSK), Longuinhos dos Santos hateten esforsu governu nian liu husi ministeriu transporte no telekomunikasaun hamutuk ho kompanha telekomunikasaun sira atu hasa’e velosidade internet nian.

“Minsiteriu Transporte no Komunikasaun halo esforsu hela atu hasa’e velosidade internet ba Timor laran tomak, tanba ne’e sira nia kompetensia,” nia hateten.

Nia konsente situasaun dadaun ne’e afeta duni ba kaulidade edukasaun, liu-liu iha ensino superior tanba ne’e opsaun ida seluk maka hasa’e kobertura kampanha vasinasaun ba komunidade akademika sira atu ema hotu bele simu vasina hodi bele hahu fali prosesu aprendijajen normal.