- Publika iha: 03 Setembro 2021
Komunidade Postu Admistrativu Soibada kuase 65% ona mak asesu ba bee moos liu husi Programa Nasional Dezenvolvimentu Suku (PNDS).
Xefe Teknika PNDS, Postu Soibada, Terezinha da Costa Moniz hateten, husi implementasaun PNDS iha 2013 liu-liu iha setor agua no sanimentu nian konsegue konkliu ona projetu hamutuk 15.
"Projetu hamutuk 15 foka liu ba instalasaun bee moos ba komunidade sira no tuir dados hatudu katak komunidade Soibada kuaze 65% mak asesu ba bee moos husi PNDS," nia hateten.
Nia dehan, durante implementasaun projetu PNDS nian ne’e foka liu ba bee tanba komunidade iha Soibada maioria aprezenta problema falta be’e moos.
“Iha ami nia menu indikativu PNDS ne’e iha setor lima mak hanesan, saneamentu no be’e moos agrikultura, edukasaun, saude no infrastrutura estrada rural,” nia hateten.
Nia dehan, tuir menu refere projetu PNDS maioria agua saneamentu, no mos konstrui klinika saude ida, no mos ponte kiik, no aterru estrada rural.
Enkuantu total orsamentu ba projetu hirak ne'e implementa ba suku lima iha Postu Administrativu Soibada kada suku hetan orsamentu ho montante $48,500.
Iha parte seluk Prezidente Autoridade Postu Amistrativu Soibada, Munisipiu Manatuto, Faustino Manuel da Cruz Lopes hateten, liu husi PNDS nia rezultadu pozitivu tebes tanba dadaun ne’e komunidade hotu bele asesu ona be’e moos ho diak.
“Uluk programa PNDS seidauk implementa iha postu Soibada ne’e iha suku rua deit mak asesu ba be’e mos ho diak, suku tolu seluk la iha,” Prezidente Autoridade Postu Soibada Lopes informa via telefone.