- Publika iha: 27 Janeiro 2024
Diretóra Ezekutiva Hospital Nasionál Guido Valdares (HNGV), Cecilia Barros Mendonca hateten durante 24 oras nia laran, sira rejista ema mate minimu nain lima (5) no maximu nain hitu (7), ne’ebé mate ho kauza oioin, laos tanba aimoruk laiha.
Nia dehan informasaun ne’ebé espalha iha públiku katak ema mate barak iha hospital tanba aimoruk laiha, ne’e laloos. Sidadaun sira ne’e mate ho kazu oioin hanesan sofre moras infesaun kleur, kurasaun, no moras la hadaet kronika sira.
“Iha 24 oras nia laran ema nain hitu mate tau iha mortuario ne’e mate ho kazu la hanesan ida-ida ho nia kazu hanesan bebe balun mai ho infesaun, mate iha inan nia kabun laran, sofre kurasaun no ema bo’ot nain hat ne’e ran midar moras kleur ona, nain rua ho stroke, ita nia mediku sira halo baut hotu-hotu labele salva.
“Hau hakarak dehan tan dala ida laos mate tanba kestaun aimoruk,” nia hateten hafoin halo enkontru ho Vice Primeiru Ministru Mariano Assanmi Sabino iha HNGV, iha Bidau, Dili.
Nia rekoñese akontese duni stok out ba medikamentu, maibe nafatin halo esforsu atu responde ba nesesidade urgente tanba ne’e pasiente sira ne’e mate laos kauza husi aimoruk laiha.
Nia enkoraja públiku atu nafatin fo konfiansa ba profesionais saúde sira iha hospital labele tauk ho informasaun sira ne’ebé espalha iha sosial media konaba prestasaun servisu iha hospital hodi prejudika kondisaun sai grave no ikus mail abele salva.
Entertantu, Vice Primeiru Ministru no Ministru Koordenador Asuntu Sosial no Ministru Dezenvolvimentu Rural, Mariano Assanami Sabino hateten reforsa sidadaun sira ne’e mate laos tanba aimoruk laiha, tan ne’e husu públiku atu labele tauk halo tratamentu saúde iha hospital tanba governu halo esforsu tomak atu garante funsionamentu hospital nian hodi fo atendimentu ne’ebé kualidade ba ema hotu.
Nia dehan relasiona ho mate isin barak ne’ebé tau iha mortuario ne’e problema kordenasaun ho Ministeriu Solidaridade Sosial no Inkluzaun (MSSI) konaba karru funerariu atu halo transportasaun ba mate isin sira ne’e ba residensia familia nian.
“Mate ida hodiseik barak ne’e laos fator aimoruk, maibe kareta funerario mak tarde demais entau mekanismu sei kordena atu kareta sira ne’e iha atu bele halo operasaun,” nia hateten.
Nia hateten fo ona orientasaun no kordenasaun ho MSSI atu normaliza orario operasaun kargu funerario iha tempu loron no kalan hodi transporta mate isin sira labele okupa espasu iha mortuario tanba durante periodu Covid-19 kareta ne’e halai deit iha tempu loron.
Iha parte seluk, Membru Parlamentu, Deputado David Dias Ximenes, hateten setór saúde ne’e area ida ne’ebe crusial tebes tanba ne’e tenke sai preokupasaun ema hotu-hotu nian atu buka rezolve.
“Funsionariu saúde nian laos hetan servisu deit, maibe sira iha kompromisu ida atu salva ema nia vida,” nia hateten.
Nia husu governu atu honestu ba problema ne’ebé akontese iha setór saúde no lalika aproveita politiza sasan sira tanba realidade povu halerik ba aimoruk no profesional saúde laiha.