- Publika iha: 11 Março 2021
Kordenador Jeral Forsa-Tarefa Prevensaun no Mitigasaun Surtu Covid-19 iha Timor-Leste (CIGC-SS), Dr. Rui Maria de Araújo hateten total kazu konfirmadu positivu Covid-19 iha Munisipio Dili hamutuk ona 36, inklui kazu foun 12, ne’ebe detekta iha loron 11 fulan Marsu.
Nia salient kazu konfirmadu sira refere, detekta Postu Administrativu Dom Aleixo hanesan foku ou cluster suku madohi kompostu husi BTN II Terra Santa kazu 6, aldeia Golgota kazu 3, Aldeia Lurumata kazu 2, no suku Comoro aldeia 4 Setembru kazu 1, Aldeia Fomento I kazu 3, no suku Fatuhada aldeia 05 kazu 3, suku Bebonuk kazu rua, Delta kazu 1. Alende ne’e detekta mos iha instituisaun publika sira hanesan Ministerio Finansas kazu 3, Sekretaria Estado Politika Formasaun Profesional no Empregu (SEFOPE) kazu 9, Ministeriu Transporte e Komunikasaun kazu 2, no Hospital Nasional Guido Valdares kazu 1.
“Husu ba populasaun iha Dili laran tomak, atu nafatin kalma, lalaika paniku no halo tuir regra konfinamentu domisiliariu jeral. Ba populasaun rezidente iha Munisipio Dili, fo’o tempu ba ekipa konjunta saúde buak tuir kontaktu besik sira hotu atu bele hapara transmisaun virus ne’e,” nia apela liu husi konferensia imprensa iha Centru Convensaun Dili.
Nia dehan iha loron 11 Marsu, detekta tan kazu foun 14, kompostu husi kazu 12 iha munisipio Dili no kazu 2 detekta hikas fali iha Postu Administrativu Fatumea Munisipio Covalima hafoin loron hat la detekta kazu foun.
Nia hatutan kazu foun 12 refere iha kapital Dili, kazu ida iha kontaktu besik ho kazu konfirmadu ida iha suku Bebonuk nian, kazu 8 identifika iha kontaktu besik husi kazu sira iha SEFOPE, kazu 2 iha kontaktu besik ho kazu konfirmadu ne’ebe iha Ministerio Finansas no Ministerio Transporte no Komunikasaun, no kazu ida seluk iha aldeia 4 setembru husi screening teste ne’ebe halao iha Tasi tolu.
Nia haktuir ekipa konjunta saúde iha terrenu nafatin foku liu ba rekoilha amostra husi kontaktu besik sira husi kazu konfirmadu sira husi agrupamentu 12 iha munisipio Dili laran, no postu Fatumea tanba ne’e presiza apoia husi populasaun tomak atu hakmatek iha uma.
Nia informa ekipa saúde iha munisipio 10 seluk no Rejiaun Administrativu Espesial Oecusse Ambeno (RAEOA) rekolla amostra hamutuk 193, liu husi atividade vijilansia sentinella, no amostra sira ne’e haruka ona mai iha laboratorio nasional atu halo analiza tanba ne’e amostra ne’ebe iha laboratoriu hamutuk 800 resin maka sei hein hela rezultado.
Tuir dadus comulativu iha loron 11 fulan Marsu tinan 2021, total kazu ne’ebe deteta foun hamutuk 14, pasiente rekuperadu laiha, no total pasiente ativu iha sala izolamentu hamutuk nain 65 ho kondisaun stavel hotu tanba maioria kazu la hatudu sintomas.
Iha parte seluk, Presidente Autoridade Munisipio Ermera, José Martinho dos Santos Soares hateten husi atividade prevensaun no mitigasaun iha munisipio sira identifika suspeitu Covid-19 nain 2, ne’ebe ekipa saúde halo ona swab hodi haruka ba laboratorio nasional atu analiza.
“Ami nia ema ne’ebe identifika ne’e maka rezultado teste positivu maka ami sei suspende hotu atividade hanesan merkadu, eskola no igreja nian tanba ohin Amu parokia telephone ona husu kona ba suspensaun atividade, maibe hau dehan ita hein hare lai rezultado,” nia hateten.
Nia dehan situasaun agora liga ba pandemia Covid-19, lori konsekuensia bo’ot ba dezenvolvimentu rai laran no moris povu nian sei vulneravel liu tan tanba laiha rendimentu.
Tuir observasaun ekipa TDW iha terrenu hare katak ekipa saúde hamutuk ho grupo voluntario sira hahu re-ativa atividade desinfetante ba instituisaun publika sira ne’ebe deteta kazu, no bairo sira iha kapital Dili ne’ebe registu kazu positivu Covid-19.