- Publika iha: 23 Agosto 2013
Ministeriu Finansa apoia tan kareta 50 ba instituisaun Polisia Nasional Timor-Leste, nune’e bele fasilita servisu polisia nian ho diak liu tan iha baze.
Kareta 50 ne’e doasaun husi Misaun Nasoens Unidas nian iha Timor-Leste (UNMIT), ne’ebe entrega ba governu Timor-Leste, hafoin sira nia misaun remata iha tinan 2012.
Kareta sira ne’e kompostu husi land cruiser hamutuk 27, kareta kamioneta hamutuk neen (6), kareta troper hamutuk hitu (7) no land rover hamutuk lima (5) inklui kareta unimok lima mos.
Assisten Logistika Nasional Polisia Nasional Timor-Leste (PNTL), Superintendente Basilio de Jesus, hateten kareta 50 ne’e balun at ona.
“Kareta land rover lima ne’e iha kondisaun at, mai iha PNTL ami la uja no ami mos define, katak alem de ne’e iha kareta hamutuk 44 maka ladun funsiona ho diak,” Superintendente de Jesus hateten, iha Dili.
Enkuantu kareta hirak ne’ebe ho kondisaun diak, nia dehan balun distribui ona ba iha komando distritu sira.
“Hanesan kareta land cruiser sira ne’e maka ami distribui ba iha distritu, ba Unidade Espesial iha kareta 10, distritu Covalima ida, Viqueque ida, Baucau ida, Manatuto ida no distritu Same ida, maibe distritu balun la hetan, tanba kareta barak mak at,” Assisten Logistika Nasional ne’e dehan.
Alem de ne’e, nia afirma, kareta land cruiser ida ba iha Departamentu Finansa PNTL, kareta ida tan fo ba Servisu Informasaun PNTL nian no ida fo ba Segundu Komandante Jeral nia eskoltu, kareta rua seluk fob a Komandante Geral nia eskoltu. “Kareta mak ne’e deit ona, laiha tan,” Superintendente de Jesus katak.
Entretantu Deputada Albina Marcal, dehan, PNTL merese duni atu hetan kareta sira ne’e, nune’e bele fasilita sira nia servisu ho diak liu tan.
“Wainhira fasilidade kompletu, buat hotu-hotu bele la’o ho diak,” Deputada Marcal dehan.
Kona ba kareta balun ne’ebe maka at, Deputada ne’e dehan, ne’e governu nia responsabilidade atu halo manutensaun.
Entretantu, bainhira TDW koko konfirma problema ne’e ba iha Diretor Patromoniu Estadu, Antonio Freitas, maibe nia lakohi fo komentariu kona ba asuntu ne’e.
“Ne’e hau ladun hatene, husu deit ba Ministra Finansas, ne’e ga?,” Diretor Freitas autoriza.