- Publika iha: 31 Julho 2013
Tribunal Distrital Dili fo pena selu multa $50 deit ba arguido AR ne’ebe involve iha kazu violensia domestika hasouru nia konjuje ho inisial AP.
Kazu violensia domestika ne’e rasik akontese iha tinan 2009, iha ne’ebe vitima AP diskunfia nia kaben AR subar feto seluk (selingkuh-Indo), ne’ebe hela iha bairo Formoza, Dili.
Bainhira Tribunal Distrital Dili (TDD), halo’o julgamentu ba kazu ne’e, vitima AP deklara katak, arguido sempre lanu bainhira fila mai uma.
“Kuandu nia tama uma, hau labele koalia buat ruma, se la’e sasan ne’ebe maka iha nia oin, nia uja hodi tuda hau, dala ruma kona hau nia ulun no hau nia isin sira ne’e,” vitima AP deklara, iha TDD, Mandarin,Dili.
Vitima diskunfia katak, arguido baku nia hodi taka nia falta selingkuh ho feto seluk ne’ebe hela iha bairo Formoza.
“Kuandu hau husu, nia dehan la’e, depois nia tuda hau ho termos, kona hau nia liman, ne’e maka hau la tahan ona no ba lapor nia iha polisia,” vitima AP dehan.
Entretantu Arguido AR deklara ba tribunal katak, lolos nia la baku AP, maibe bainhira AR fila ba uma, vitima sempre buka problema uluk.
“Hau to’o uma, nia sempre dehan nusa maka la ba han iha o nia feto- feto sira, ho lian hakilar,” arguido AR deklara.
Agruido dehan, feto ne’ebe maka vitima dun ba nia ne’e, nudar nia kliente nudar taxista.
“Feto ne’e hau nia langganan, la’os selingkuh. Karik nia rona husi kolega sira, tanba bain-bain ami goza malu hanesna ne’e,” arguido esplika.
Iha julgamentu ne’e, arguido arepende ba hahalok ne’ebe nia halo ba vitima no promote sei la halo tan attitude ida ne’e iha future.
Molok ne’e advgadu husu ona ba iha TDD atu hakma’an pena tanba arguido arepende no promote sei la halo tan.