- Publika iha: 12 Julho 2013
Parlamentu Nasional hasai no aprova ona rezolusaun, atu prosesa lalais oknum membru Polisia Nasional de Timor-Leste ne’ebe baku Deputadu Manuel Castro, foin lalais, iha area Audian nian.
Prezidente Komisaun B Parlamentar (seguransa, defeza no negosiu estranjeiru), Deputada Maria Lurdes Bessa hateten, rezolusaun ida ne’e hanesan instrument politika atu kondena maka’as atuasaun oknum Polisia (PNTL) ne’ebe baku deputadu no sidadaun sira.
“Ne’e desizaun politika deit, atu hatudu lolos deskontentamentu Parlamentu nian kona ba atuasaun PNTL,”dehan Prezidenti Komisaun B, Deputada Bessa, iha Parlamentu Nasional.
Prezidente Komisaun B, konsidera hahalok oknum PNTL ne’e grave teb-tebes no presiza halo investigasaun ba sira.
“Horseik ami halo ona debate urjensia ho senhor Sekretariu Estadu Seguransa, ejiji halo investigasun klean ho kondisaun ne’ebe ezemplar,” Deputada Bessa katak.
Nia dehan, Komisaun B nafatin akompanha prosesu atu halo investigasaun ba kazu ida ne’e, nune’e bele la’o diak no transparansia.
Enkuantu kazu oknum PNTL baku Deputadu Manuel Castro ne’e akontese iha loron Sexta-feira, dia 31 Maiu 2013, iha area Audian nian, kuaze tuku 09:30 dader, Oras Timor-Leste (OTL).
Entretantu Deputadu Manuel Castro ne’ebe sai vitima husi atuasaun oknum PNTL ne’e konta katak, iha momentu ne’eba,nia parte ba ho intensaun atu hapara atuasaun PNTL ne’ebe iha momentu ne’e baku no tebe hela joven ida iha area Audian nian.
“Hau ba kaer polisia ne’e hodi dehan, para ona, labele baku ona, lori deit ba iha kuartel polisia, depois hau koalia tiha hanesan ne’e, membru Task Force husik joven ne’e, hodi ataka fali hau,” dehan Deputadu Castro.
“Sira hakilar mai ha’u hodi dehan katak, o laiha direitu, o la manda iha ne’e, ne’e só ami mak manda, ha’u hatan hodi dehan sim, ha’u la manda, maibé ha’u dehan sira katak ita bo’ot sira tenke professional oituan, labele baku ema ida henasan ne’e, ema ida kareta isin ida maka baku, ne’e ita bo’ot sira servisu la professional,’’ Deputadu ne’e konta.
Nia akresenta katak, hafoin hatene katak nia deputadu, membru Task Force sira seluk husi kotuk hakilar hodi dehan katak “deputadu ne’e mak ami buka duni,”. “Ida seluk husi kotuk hakat mai liu husi nia Komandante nia kotuk atu tuku hau, hau ses tiha, kona kois iha ha’u nia oin, ida tan haksoit mai hodi hakilar; ida deputadu ne’e mak ami buka duni, ami baku imi rai la nabeen, deputadu ne’e het nia aman, beik ten, halo lei la loos, ami baku imi tasi la sae no rai sei la nabeen,” dehan Deputadu Castro.
Iha sorin seluk Komunidade Audian,Manuel da Silva ne’ebe mak hare ho matan ba akontesementu ne’e hateten, membru Polisia Task Force balun tuku husi kotuk kona duni deputadu ne’e.
“Iha momentu ne’e ami barak mak iha ne’e,ami hare deputadu hetan baku duni husi polisia,” dehan testamunha ne’e.