- Publika iha: 05 Julho 2013
Polisia Tranzitu Nasional to’o agora sei falta ekipamentus balun ne’ebe presiza hodi fasilita sira nia servisu iha terenu,liu-liu ekipamentus ne’ebe relevante ho asidente trafiku ne’ebe dalabarak akontese iha estradas.
“Ami presiza tebes alko tes no alko limitu atu halo teste ba ema sira ne’ebe mak lori kareta hp lanu, laiha kamera atu hasai foto no fita metro atu sukat iha fatin akontesimentus bainihra akontese asidentes,” Komandante Polisia Tranzitu Nasional (POLTRANS), Inspektor Xefe Antonio L.C. Soares, foin lalais, iha Dili.
Nia dehan, durante ne’e akontese asidente trafiku barak iha capital laran, maibe POLTRANS labele identifika motive tanba laiha ekipamentus.
Alem de ne’e Komandante ne’e hatutan, POLTRANS mos sei falta transportes,liu-liu motorizadas tanba motorizadas ne’ebe iha agora at tiha ona.
“Ami uja motorizadas husi tinan 2002 nian to’o agora laiha manutensaun e dadaun ne’e ami iha deit motorizadas hat, maibe membrus barak liu fali entaun la sufsiente,” Komandante Soares tenik.
Komandante Soares mos preokupa tanba durante ne’e sira rasik hasai osan hodi halo manutensaun ba motor ne’ebe sira uja tanba osan ba manutensaun laiha maske iha planu annual sira hato’o bei-beik ona asuntu ne’e.
“Polisia Tranzitu barak mak durante ne’e hala’o servisu, sa’e sira nia motor rasik, lolos ne’e ami iha motor para akontese pelanggaran ruma, bele duni tuir maibe agora motor laiha entaun sira hateke de’it,” Komandante Soares katak.
Entretantu membru Komisaun B (Negósiu Esrajeirus, Defeza no Seguransa), Deputadu Jacinto Viegas Vicente hateten, importante tebes governu apoia fasilidades ba servisu POLTRANS nian, nune’e bele regula movimentu transporte iha Dili laran.
“Tanba bain-bain hau haree, bainhira iha asidente ruma sira ba tenke lori fali fita metric ida ne’ebe bada’en sira uja hodi ba sukat asidente, ne’e tanba sira laiha ona fasilidade,” Deputadu Vicente katak.
Deputadu ne’e fo ezemplu, wainhira nia ba iha Ermera iha asidente trafiku ida, membru POLTRANS sira halai tun sa’e foti metro ida iha alfaiati nian ba sukat fali estrada.
“Ne’e defisil atu sira servisu ho di’ak, tanba ne’e sira nia fasilidades tenke kompletu, hanesan mákina hasai foto , atu sukat se mak sala no loos, Komando Jerál tenke haree ba ida ne’e,” Deputadu Vicente dehan.
Tanba ne’e nia husu ba Sekretariu Estadau Seguransa hamutuk ho Komando Jeral PNTL, atu tau matan ba kestaun ne’e.