- Publika iha: 28 Maio 2013
Durante ne’e Klinika Polisia Nasional Timor- Leste halo tratamentu movel ho permanente ba membru polisia sira iha distritu tolu ne’ebe fronteira ho Indonezia.
Xefe Klinika Polisia Nasional Timor-Leste (PNTL), Inspektor Abilio de Araujo hateten, distritu Bobonaro, Suai no Distritu Oe-Cusse sai prioridade sira nian hodi fo tratamentu movel ba sira nia membrus sira.
“Ami prioridade ba distritu tolu ne’e tanba linha de fronteira, tanba ita hare moras balun mos bele afeta ba ami nia membrus sira iha ne’eba,” tenik Xefe Klinika PNTL, Inspektor Abilio de Araujo, (09/04), iha Kaikoli, Dili.
Enkuantu moras ne’ebe afeta maka’as ba nia membrus sira iha fatin tolu ne’e, nia dehan, mak moras Infesaun Respiratoriu (ISPA) no hipertensaun.
“Ami mos kordena ho ospital referral sira iha ne’eba, atu nune’e sira mos tau matan ba membru sira ne’e, wainhira moras ruma ataka sira,” dehan Xefe Klinika PNTL ne’e.
Kona ba aimoruk nia afirma, sufsiente duni atu bele hala’o atendementu saude ba sira ne’ebe maka hela iha distritu tolu ne’e.
Iha parte seluk Deputada Albina Marcal hateten, ne’e programa ne’ebe diak hodi bele fo tratamentu intensivu ba Polisia sira ne’e.
“Membru polisia sira merese ou iha direitu atu asesu ba saude ne’ebe maka sustentavel,” dehan Deputada Marcal.
Maibe nia mos sujere, programa hanesan labele halo deit iha distritu tolu, tenke hala’o ba polisia sira iha distritus hotu.
“Sira ne’ebe maka hela iha distritu seluk mos presiza atu kontrola sira nia saude,” sujere Deputada Marcal.