- Publika iha: 14 Outubro 2013
Ministru Justisa, Dionisio Babo fo apela ba komunidades ne’ebe maka hakarak atu hatene leis ne’ebe vigora ona iha rai laran, presiza partisipa ativu iha sosializasaun, nune’e bele iha konesementu.
Ministru Babo dehan, dala barak husi parte governu, no institusaun hanesan Provedoria Direitus Humanus no Komisaun Anti Korupasaun halo sosializasaun kona ba lei relevante, dala ruma komunidades ladun partisipa.
“Tanba ne’e hau husu ba komunidade sira, favor ida kuandu iha sosializasaun lei hanesan ne’e, hotu-hotu tenke partisipa, labele xefe suku mak ba deit, administrador deit maka ba,” Ministru Babo apela, iha Bebora, Dili.
Nia dehan, komunidade presiza kolabora ho governu, la’os hein ejiji deit, komunidade mos buka atu hatene, tanba sistema governu nian hodi halo deziminasaun kona ba lei ne’e tuir kapasidade ne’ebe maka iha.
“Ami halo desiminisaun ne’e alem de ba hasoru direitamente, iha mos maneira seluk hanesan liu husi jornal, liu husi radio, liu husi televisaun, ne’ebe fasil atu asesu, importante maka maluk sira iha vontade atu hakarak hatene,” dehan Ministru Babo.
Iha lidun seluk Diretor Judicial System Monitoring Program (JSMP), Luis de Oliviera Sampaio, rekonese katak durante ne’e husi parte Ministeriu Justisa tun ba baze halo desiminasaun kona ba lei ne’ebe maka vigor ona iha rai ida ne’e, maibe governu presiza haforsa sira nia sistema.
“Komunidade nia kapasidade komprende prosesu ne’e halo nusa no sira presiza dezenha ninia prosesu no mekanismu atu ba povu nia le’et tuir kapasidade povu nian, no halo material ne’e simples tiha, nune’e povu bele komprende lalais,” Diretor JSMP ne’e sujere.
Iha fatin seluk, estudante Ajay Fernandes hateten, la komprende leis laos deit komunidade sira iha area rural maibe iha capital Dili mos seidauk iha konesementu ba leis ne’ebe iha.