- Publika iha: 05 Novembro 2015
Deputy Program Manager Organizasaun Marie Stope’s Internasional Timor –Leste (MSITL), Juliao da Silva, hateten estabelese ona klinika movel iha area rural hodi fo atendimentu Planeamentu Familiar (PF) ba familia sira iha area remotas.
Nia dehan, inisiativa dezenvolve mobile klinika ne’e atu fasilita komunidade sira liu –liu inan feto sira ne’ebe hakarak hetan atendimentu PF, kontrola isin rua bele asesu e la presiza lao do’ok.
“Ita iha hanoin atu dezenvolve mobile klinika Marie Stope’s nian hodi fo atendimentu iha sukus no aldeias e komunidade sira la presiza lao do’ok tan,” da Silva hateten, iha servisu fatin Vila Verde, Dili.
Nia hatutan, mobile klinika (klinika tenda) sei iha sala hat hodi fo atendimentu ne’ebe seguru no asegura konfidensialidade, tanba segredu pasiente nian importante tebes e mos hanesan meius ida atu motiva komunidade sira vizita fasilidade saude koko sira nia moras.
“Seguru no konfidensial, tanba tenda ne’e sei iha sala hat ba konsulta inan isin rua sira, planemanetu familiar, moras hada’et liu husi relasaun seksual no seluk tan,” nia hateten.
Nia dehan, ekipa ne’ebe sei fo atendimentu ba iha komunidades, la’os deit husi MSI maibe pesoal saude publiku sira, tanba servisu hamutuk ho Ministerio Saude liu husi saude munisipalite sira.
“Klinika movel ne’e tenke iha asistensia husi professional saude sira, labele husik funsionario organizasaun mesak, tanba professional saude mak iha dever liu tanba metodu sira ne’e iha mos impaktu ba saude,” Deputada Soares sujere.