- Publika iha: 27 Outubro 2015
Xefe Unidade Banku Nasional de Sangue (BNS), Arsenio Jose Afonso, hateten hala’o doasaun ran regular bele redus risku moras tensaun nian, tanba sirkulasaun ran iha isin kontroladu e ran ne’ebe tuan hasai tutuir.
Tanba ne’e, nia dehan, importante tebes atu halo doasaun ran regular, nune’e bele kontrola kondisaun saude; sirkulasaun ran iha isin no liu-liu salva ema ema seluk nia vida.
“Durante fulan tolu sistema ran rua mak sirkula ona iha ita nia isin (ran tuan no foun), entaun ita tenke hasai ran tuan hodi labele fo impaktu fali ba ita nia saude liu –liu moras tensaun as no ita mos bele kontrola ita nia saude rutina husi moras infeksaun sira,” Afonso hateten, bainhira halao doasaun ran iha salaun Sekretario Estado Juventude e Desportu (SEJD), Lecidere, Dili.
Nia rekonese, katak atividades sosializasaun no promosaun ba komunidade sira kona ba vantagen husi hala’o doasaun ran regular ne’e minimu tebes, tanba ne’e komunidade barak tauk no lakohi halo doasaun.
“Tanba ami mos falta rekursus humanus no orsamentu atu hala’o kampanha hasa’e konesementu komunidade sira nian kona ba benefisio hala’o doasaun ran reguler,” nia hatutan.
Nia hatutan, esforsu ne’ebe sira halo mak servisu hamutuk ho instituisaun Falintil-Forsa Defeza Timor –Leste (F-FDTL), Polisia Nasional Timor-Leste (PNTL), Bombeirus no doasaun voluntario sira hodi garantia stok iha banku nasional.
Iha parte seluk reprezentante voluntario, Youngky Kawengian, hateten hala’o doasaun ran regular ne’e importante tebes tanba alende ajuda ema ne’ebe presiza, bele mos kontrola saude no hadia sirkulasaun ran iha isin.
“Ita la hatene se mak simu ita nia ran hirak ne’e, maibe ida ne’e hanesan asistensia ida hodi salva ema seluk nia vida no hau nia isin diak, laiha moras ida ne’e sasin ida ba ema hotu,” Kawengian hateten.
Tanba ne’e, nia sujere ba Ministerio Saude no Ospital Nasional Guido Valadares (HNGV) atu halibur doador voluntario sira hodi bele kontribui fo ran regular no hala’o kampanha kona ba importansia fo ran reguler ba komunidade sira atu iha konesementu hodi kontribui mos.