- Publika iha: 12 Setembro 2015
Manager of Clinical Services Fred Hollows Foundation New Zealand (FHFNZ) Timor-Leste, Belmerio Jeronimo, hateten oras ne’e dadaun Sentru Nasional Matan (SNM) halo konsulta matan movel iha munisipio hotu no bolu atensaun ba komunidades, katak sira presiza hatene sira nia kondisaun matan.
Nia dehan, SNM nia ekipa outreach sira durante ne’e hala’o ona konsulta no screening matan movel ba komunidades iha munisipio balun, tanba matan importante tebes ba ema nia moris.
“Fo hatene ba komunidade sira, katak presiza hatene sira nia kondisaun matan,” Manager Belmerio hateten, iha servisu fatin Bidau, Dili.
Nia hatutan, iha atividades outreach ne’e sira identifika komunidades ne’ebe presiza halo operasuan matan, tenke halo operasaun liu-liu katarak, haruka mai nasional atu halo operasaun no balun ne’ebe labele halo operasaun iha rai laran haruka ba rai liur.
Nia hatutan, problema matan ne’ebe sira registus as mak komunidade kuaze 40% presiza oklu atu ajuda hodi haree do’ok no besik, katarak, matan mean no kankru matan.
Nia informa, Timor oan agora dadaun idade 30 ba leten labele ona haree do’ok, presiza oklu hodi ajuda haree letra sira, e kauza principal ida mak idade ona no konsumu vitamina C menus.
Iha parte seluk, Membru Parlamentu Nasional, Deputado Jorge da Conçeicão Teme, apresia ho servisu SNM nian durante ne’e, tanba fo ona atendimentu matan ba komunidade rihun ne’e labele haree, bele haree fila fali depois halo operasaun.
Reprezentante povu ne’e mos husu ba governu atu fo mos prioridade ba asuntu ida ne’e hodi asegura ezistensia no funsionamentu SNM tanba espesialista matan Timor oan sei menus.
“Hau sujere ba Ministerio Saude koalia didiak ho parseiru sira atu garantia ezistensia sentru matan hodi bele tulun ita nia povu ne’ebe presiza duni hadia sira nia matan husi moras matan oioin ne’ebe iha,” nia sujere.
Klinika nasional matan durante ne’e hetan apoiu tekniku no finanseirus husi orgnaizasaun internasional The Fred Hollows Foundation NZ.