- Publika iha: 04 Maio 2016
Diretor Laboratorium Nasional (LabNas) Ministeriu Obras Publik Transporte e Komunikasaun (MOPTK), Saturnino Gomes, hateten sira presiza tekniku nain 80 atu servisu iha LapNas hodi kontrolu ba obras hotu iha teritoriu tomak.
Nia dehan, total tekniku ne’ebe agora dadaun iha hamutuk nain 20 deit, enkuantu obras barak mak la’o hela iha munisipiu no postu administrativu inklui sukus no aldeias barak loos.
“Ami presiza ema minimu nain 50 no masimu nain 80, agora ne’e ami iha deit 32 pessoas kompostu husi tekniku nain 20 no seluk administrasaun hotu, ne’e ami labele perkore obras hotu ,” Diretor LabNas Gomes hateten, iha Dili.
Tanba ne’e, ekipa Laboratorium Nasional barak liu kontrolu obras sira iha sidade Dili duke iha munisipius no area rural sira.
Iha parte seluk Deputada Albina Marcal, konsidera ida ne’e hanesan difikuldade ida ne’ebe mak laboratorium infrenta.
“Tenke toma atensaun husi ministeriu tutela,” nia sujere.
Tanba tuir nia, servisu laboratorium nasional importante tebes atu garantia kualidade obras hotu ne’ebe mak la’o hela iha teritoriu.
“Sira tenke ba haree obra ne’e, kompania halo iha duni kualidade ga lae, ne’e sira nia servisu,” nia dehan.
Iha parte seluk komunidade Mateus Almeida, hateten durante ne’e obras barak mak laiha kualidade, tanba kontrolu husi governu minimu liu.
“Entaun kompania halo tuir sira nia hakarak e ikus mai obras lubuk ida mak laiha kualidade, halo ohin la to’o tinan, komesa aat fali ona,” nia hateten.