- Publika iha: 29 Março 2016
Koordenador Apoiu Fundus ba Sosiedade Sivil iha gabinete Primeiru Ministru, Joaquin Freitas, hateten iha tinan 2016 ne’e governu aloka orsamentu ho montante $9 miloens resin atu apoiu programa servisus sosiedade sivil ba dezenvolvimentu rai laran.
Nia dehan, tinan 2016 ne’e laiha osan ba iha programa foun, maibe sei haree deit ba proposta kontinuasaun programa hodi finaliza.
“Tinan ida ne’e alokasaun fundus sosiedade sivil iha $9 miloens ital ba projetu kontinuasaun, projetu foun laiha tanba orientasaun governu ne’e konsentra ba programa ne’ebe la’o ona to’o finalize,” Koordenador Freitas hateten, iha sede veteranus Taibesi, Dili.
Nia hateten, kada tinan proposta ne’ebe tama iha gabinete fundu sosiedade sivil hamutuk 200 resin, maibe aprova proposta balun deit, tanba rekursu humanus ne’ebe atu kontrola ne’e sei menus.
“Proposta balun ami haree diak, maibe husu osan la realistiku entaun ami hasai,” nia hateten.
Kona ba sosiedade sivil sira ne’ebe hetan black list, nia la fo sai numeru klaru maibe iha balun tanba viola dekretu lei No 5/2005 regula sosiedade sivil no hatama relatoriu la tuir deadline.
Nia informa, rekezitus ne’ebe sosiedade sivil sira tenke preense atu asesu ba iha fundus sosiedade sivil ; mak proposta tenke klaru husi asosiasaun ou organizasaun, estruktura klaru, misaun no vizaun, programa sustentabilidade inklui mos edifisio permanente, nune’e fasil atu kontrolu.
Nia hatutan, iha tinan 2015 sira apoiu organizasaun sosiedade sivil hamutuk 89 hodi hala’o programa ba dezenvolvementu.
Iha parte seluk Membru Parlamentu, Deputada Albina Marçal, hateten kada tinan parlamentu aprova osan hodi apoia sosiedade sivil sira hanesan parseiru governu nian ba iha dezenvolvementu Timor –Leste.
Nia mos, husu ba koordenador atu aprezenta relatorio ezekusaun iha plenaria, nune’e membru parlamentu sira bele iha konesementu ba ezekusaun.
“Aprezenta relatorio iha plenaria, nune’e deputadu sira bele iha konesementu ba iha ezekusaun fundus sosiedade sivil nian,” nia sujere.
Entretantu Sekretario Jeral Klibur Organizasaun Resistensia Timor –Leste (KORENTIL), Jose Monteiro, hateten klibur ne’e halibur organizasaun 25 ho programa ne’ebe la hanesan.
Nia dehan, ho apoiu fundus ne’ebe iha, sira fo ona formasaun iha munisipios 12 no regiaun espesial Oe-Cusse kona ba prevensaun konflitu.
“Ami nia mehi mak hametin unidade nasional, harii pas no estabilidade nasional hodi nune’e fo oportunidade ba governu no estado atu halo dezenvolvimentu,” nia hateten.