- Publika iha: 12 Abril 2013
Lian Indonezia ka Melayu ne’ebe kontinua uza hodi hanorin iha Universidade Nasional Timor Lorosa’e to’o ohin loron, halo estudantes barak ne’ebe akaba eskola sekundariu ho lian Portugues hetan notas ladiak.Estudante Departementu Komunikasaun Sosial iha Universidade Nasional Timor Lorosa’e (UNTL), Basilia Maria Guterres hateten nia sente desaraska bainhira tuir prosesu aprendizajen ho lian Indonezia tanba sira akaba sira nia estudu iha sekundariu ho lian Portugues.
“Ba ha’u pessoalmente triste los tanba iha sekundaria ami aprende materia hotu ho lian Portugues e iha UNTL materia balun hanorin fali ho lian Indonezia, entaun ami la komprende ho materia ne’ebé maka dosenti sira hanorin ne’e, tan ne’e wainhira iha ezame ami la hatene resposta, entaun ami nia notas iha semester ida no rua nian ne’e, labele hetan notas diak hotu,” preokupa estudante Basilia Maria Guterres, iha Kampus UNTL, Dili.
Tanba ne’e nia husu ba universidade iha tinan ida ne’e, atu hadia sistema ida ne’e, se bele dosente ne’ebe hanorin ne’e tenke ho lian Portugues, nune’e estudante sir abele hetan notas diak fali.
“Para labele halo vitima tan ba ami nia maluk estudante ne’ebé mak tuir ami, e mos ha’u husu se bele karik haree lalais ami nia biblioteka hodi prepara livrus ba ami estudante no dosentes sira iha departamentu ida ne’e,” sujere estudante ne’e.
Entretantu membru Komisaun F (saúde, edukasaun, veteranus no igualidade jenéru), Deputada Ilda Maria da Conceicão hateten, problema ne’e akontese tanba dosente sira ne’ebé hanorin ne’e mai husi baze de estudu ho lingua Indonezia.
“ Hau hanoin orsamentu aprova tiha ona, karik komesa agora UNTL bele ona fo formasaun ba dosente sira ne’e ho lian Portugues, nune’e tinan ne’e sir abele hahu hanorin ho lian Portugues,” sujere Deputada Ilda.