- Publika iha: 12 Abril 2013
Bolseirus Timor oan nain rua ne’ebe suporta husi Governu Australia hodi kontinua sira nia estudu iha Universidade Australia, iha esperansa bo’ot wainhira fila mai sei kontribui ba dezenvolvementu nasaun Timor-Leste.Pedro Setioroni, bolseiru ne’ebe ba hasai nia estudu iha area finansas nian iha Universidade Queensland, Australia promote katak matenek ne’ebe nia hetan durante estudu sei aplika fali iha Timor-Leste bainhira hotu.
“Hau iha ne’e foti lisensiatura kona ba finansas tanba ita nian jestaun kona ba finansas seidauk diak, ita presiza ema ne’ebe iha kapasideade jestaun finansas,” tenik Bolseiru Pedro Noel Setioroni, foin lalais, iha Marconi, Dili.
Nia dehan , maske sente triste tanba husik hela familia, maibe kontente tanba hetan oportunidade hodi ba hasai kursu jestaun finansa nian iha Australia.
“Husik hau nia familia hau senti triste oituan maibe hau sente kontente tanba hau ba atu aumenta hau nia kapasidade matenek iha ema nia rai,” dehan Bolseiru Setioroni.
Universidade Australia nia hatutan, iha fasilidades kompletu hanesan biblioteka, laboratorium no komputador kompletu hodi fasilita estuda ho diak.
“Ita mos bele hasoru malu ho ema ne’ebe expert ba sira nia area rasik tanba ema sira ne’ebe mai iha eskola no servisu iha ne’e, ema mesak iha kapasidade,kualidade no matenek, tanba ne’e bainhira hau fila mai hau sei implementa tuir, hodi kontribui ba Timor,” promete Setioroni.
Iha sorin seluk Bolseira Dulce Natividade Fatima da Cunha ne’ebe hasai kursu iha area Master Politik no Manajementu iha Universidade Melbourne, Australia promote mos katak hafoin remata estudu iha Australia, sei servisu iha governu,liu-liu atendementu publiku ninian.
“Ida ne’e hau nia prioridade, bainhira remata hau hakarak hare kona ba politik sira ne’ebe eziste ona, no ba funsionariu publiku oinsa sira bele halo atendementu ne’ebe ke diak ba publiku,” promesa Bolseira da Cunha.
Nia dehan, durante ne’e servisu atendementu iha banku emerjensia ospital iha Timor ladun diak.
“Wainhira hau lori hau nia subrinu ba iha ospital iha banku emerjensia, parteira sira iha ospital duni ami fila katak, labarik sira moras ne’e la’os kazu emerjensia entaun hau haksesuk malu ho sira iha ospital tanba sira nia atendementu ba publiku la diak,” Bolseira da Cunha kritika.
“Tanba ne’e bainhira hau fila mai, hau servisu iha governu hau sei hadia hikas atendementu publiku ne’ebe durante ne’e la’o ladun diak,” promesa Bolseira da Cunha.
Da Cunha sei remata nia estudu iha Universidade Melbourne iha fulan Dezembru tinan 2013 no fila mai Timor iha tinan 2014.
Entretantu Vise Ministru Ensino Sekundariu, Virgilio Smith katak,governu iha esperansa bo’ot ba bolseirus sira ne’e maibe la kria empregu ba sira.
“Hau ba hetan bolsa, mai fali governu mak tenke fo servisu, ida ne’e mentalidade sala,” dehan Vise Ministru Smith.
Tanba ne’e nia husu Bolseirus sira bainhira remata estudu, tenke presta sira nia skill iha area ne’ebe deit e la’os hein deit governu mak kria kampu servisu.