- Publika iha: 09 Abril 2013
Passajeirus liu-liu estudante sira sente preokupada ho tarifas ba mikrolete ne’ebé sirkula iha Dili laran tanba estudante sira mos selu hanesan ho ema bai-bain.Tuir Estudante husi Eskola Sekundaria 04 de Setembro, Lamartinho Freitas katak kondutóres mikrolete 010 ne’ebe hala’i ba diresaun Comoro hasa’e tarifa tuir sira nia hakarak.
“Ha’u senti triste tebes ho tarifas hirak ne’e tanba dalabarak kondutór la konsidera ami nu’udar estudante e sira ezije nafatin atu selu 0,25 sentavus,” preokupa Estudante Freitas, foin lalais, iha Dili.
Tanba ne’e nia sujere ba Diresaun Nasional Transporte e Terestres (DNTT), atu hare asuntu ne’e, nune’e estudante sira labele sai vitima beibeik husi kondutor sira.
Entretantu Luis Tilman, staf Pertamina Super Fuel iha Kulu-hun, hateten folin mina gazolina dollar ida sentavus 40, solar dollar ida sentavus 21.
“So mina husi Australia ne’e ami fa’an ho dollar ida sentavus 52,” tenik Staf Pertamina Super Fuel ne’e.
Enkuantu Kondutór Mikrolet 010, Paulino Soares katak nia aplika tarifa hanesan hotu, la haree ba estudantes ou pasajeiros bain-bain tanba estudantes ne’e barak liu mak la uza farda.
“Ami la hatene atu estudantes ka la’e tenke selu kuarter, se lakohi selu kuarter, diak liu lalika sa’e,” dehan Kondutor ne’e.
Iha parte seluk Deputadu Inacio Moreira, husu ba Ministeriu Komunikasaun e Transporte atu kontrola ba folin mina iha pertamina sira, liu-liu sira ne’ebe fa’an hasa’e folin tuir sira nia hakarak.
“Se karik iha ema balun komete hasa’e ninia folin, tenke hetan sansaun,” sujere Deputadu Moreira.
Deputadu ne’e mos husu ba kondutor transporte públikus hotu, atu iha konsiénsia no komprende tanba estudantes hotu sira nia situasaun la hanesan, tenke hatun presu ne’ebe determina ona usi DNTT katak estudante selu des sentavus.