- Publika iha: 08 Março 2013
Membru Parlamentu Nasional preokupa tebes ho kondisaun Eskola Ensino Baziku Farol ne’ebe to’o agora falta salas e situasaun ne’e impede prosesu aprendizajen atu la’o ho diak.Tuir Deputada Bendita Magno katak eskolas ne’e salas la sufsiente tanba durante ne’e estudante husi primeiru siklu to’o terseiru siklu hamutuk iha fatin ida deit.
“Eskola filial hat mak hamutuk iha eskola ensino baziku Farol, tanba ida ne’e mak hakarak hato’o deit ba senhor ministru ita hare to’ok kondisaun ida ne’e,” preokupa Deputada Bendita Moniz Magno, (18/02), iha Parlamentu Nasional.
Deputada ne’e hateten, durante estudantes sira tuir aprendisazen iha oras rua nia laran deit depois estudante seluk utiliza fali sala hodi tuir aprendizajen.
Hatan ba preokupasaun ne’e ,Vise Ministra do Ensino Baziku,Dulce de Jesus Soares katak, ida ne’e mosu tanba impaktu husi agrupamentu estudante husi primeira to’o terseiru siklu ne’ebe agrupa iha fatin deit.
“Tanba ne’e tinan ne’e ministeriu sei halo revizaun ba dekretu lei no 7/2007 kona ba estabelesementu eskola ensino baziku atu nunue’e halo pemerataan ba estudantes hotu-hotu,” dehan Vise Ministra ne’e.
Entretantu Diretor Interino Eskola Ensino Baziku Farol ne’ebe lakohi publika nia identidade rekonese katak salas de aula ba estudantes sira la sufsiente duni tanba sala hamutuk hitu (7) deit.
“Imi hare to’ok ami nia estudante sala la to’o ne’e mak balun tuir aula iha liur deit,”dehan Diretor Interino ne’e.
Tuir observasaun TDW nian ba eskola refere nota katak,estudantes hamutuk 40 resin ho profesor nain ida tuir hela aprendisazen iha baraka oan ida iha eskola kotuk.