- Publika iha: 26 Fevereiro 2013
Membru Parlamentu Nasional sujere ba Ministeriu Edukasaun atu fo bolsu estudus kona ba lian Portugues nian ba profesor sira, atu nune’e bele hatene diak liutan lingua Portugues hodi hanorin ba estudante sira.Deputada Anastacia da Costa Amaral dehan Governu presiza fo bolsu estudus ba profesor sira atu nune’e bele dezenvolve sira nia kapasidade ba lingua Portugues.
“Labele halo kontinua kursu intensive maibe bele mos fo bolsu estudus ba profesor sira atu nune’e aumenta tan konesementu ba lingua Portugues,” sujere Deputada Anastacia da Costa Amaral, iha Parlamentu Nasional, (18/02).
Entretantu Vise Ministru Edukasaun ba Ensino Sekundariu, Virgilio Smith katak, oras ne’e dadauk ministeriu sei hare hela metodus no formas foun oinsa mak bele fo formasaun ba profesores sira ba iha rai liur no mos iha rai laran.
“Asuntu ne’e ministeriu sei hare hela metodus foun ho formasas foun ba profesores sira,” tenik Vise Mnistru ne’e.