- Publika iha: 17 Julho 2012
Ministru Edukasaun fo xamada atensaun ba Universidade sira ne’ebe loke sira nia cabang iha Distritu, tanba laiha autorizasaun husi Ministeriu Edukasaun (ME).“Ami fo xamada atensaun ba reitor sira hotu liu husi hakerek surat, atu labele loke cabang iha distritu sira, tanba laiha lisensa no sira tenke legalize inklui mos labele lori dosentes sira husi Dili mai para hanorin no kaer fali professors sira husi Ensino baziko mak hanorin,” hateten Ministru Edukasaun, Joao Cancio Freitas, iha Baucau.
Ministru hato’o kestaun ne’e relasiona ho Universidade barak mak komesa loke sira nia cabang iha Distritu e dosente ne’ebe hanorin mos mai husi nasional no ikus mai laiha kualidade.
“La’os semana ida ba hanorin oras ida rua la hun la dikin depois liu tinan tolu ba ona simu diploma, ne’e aban bainrua sai saida,” Ministru ne’e preokupa.
Ministru mos espera katak, iha future ministru foun bele tau atensaun ba akreditasaun programa kursu-kursu sira hodi garante kualidade.
Maske nune’e, estudante sira iha universidade ne’ebe loke ona cabang iha Distritu, kontinua hala’o sira nia prosesu aprendijazen. “Ami kontinua hala’o ami nia estudu hanesan bai-bain, e ida ne’e politika governu nian,” dehan Estudante Olinda Ribeiro.