- Publika iha: 27 Abril 2012
Diretor Eskola Primaria Uaimanu-boe, Suku Uailili, Sub-distritu Baucau, Distritu Baucau, Mariano Andre Freitas, informa oras ne’e dadaun sira nia eskola salas la sufisiente, atu estudante sira hala’o prosesu aprendizajen,e husu ba Governu atu tau matan ba asuntu ne’e.“Ami nia eskola sala tolu deit, estudante sira barak,entaun meja-kadeira sira ne’ebe resin tau hotu ba sala laran fo difilkulta ba alunus sira nia aprendizajen,” hateten Diretor Freitas, semana kotuk (16/04) iha Uaimanu-boe,Baucau.
Diretor ne’e dehan, total estudante ne’ebe oras ne’e dadaun eziste iha eskola ne’e hamutuk 570 estudantes.
“Tanba ne’e mak ami hakarak husu ba Ministeriu Edukasaun bele karik aumenta tan ami nia eskola,”Diretor Freitas sujere.
Iha fatin hanesan Estudante Hilario Sarmento Freitas dehan, meja-kadeira barak mak tau hamutuk iha sala laran no okupa deit fatin, tanba ne’e husu ba Governu atu loke salas eskola nian.
“Ami nia eskola sala tolu deit, entaun meja-kadeira sira tau tan iha sala laran, fatin ita tur mos la to’o,” Estudante Freitas preokupa.