- Publika iha: 19 Setembro 2014
Sentru Treinamentu Vokasional Akreditadu (STV) kesar Sekretariadu Estadu Politika Formasaun Profesional e Empregu (SEPFOPE) ba Parlamentu Nasional, tanba to’o agora SEPFOPE seidauk aloka osan ba sira.
Membru Parlamentu Nasional, Deputada Benvinda Catarina Rodrigues, hateten keixa ne’e hato’o direitamente husi diretor STV husi sub-distritu Gleno, diretor STV husi distritu Baucau no Manatuto mai iha parlamentu, katak SEPFOPE seidauk aloka osan ba sira.
“Ne’ebe ami husu ba SEPFOPE atu justifika,” Deputada Rodrigues sujere, iha Parlamentu Nasional.
Nia dehan, Parlamentu Nasional preve tiha ona ba sentru formasaun ne’ebe akreditadu no sira iha direitu ba osan governu nian.
“Maibe tanba saida mak seidauk to’o iha STV nia liman,” Deputada Rodrigues hateten.
Hatan ba kestaun ne’e Sekretariu Estadu Politika Formasaun Profesional e Empregu (SEPFOPE), Ilidio Ximenes da Costa, rekonese katak iha tinan kotuk iha duni failansu, tanba sentru balun simu dupla.
“Sira hatama proposta orsamentu mai iha SEPFOPE e ao mesmu tempu hetan mos fundus husi fatin seluk,” SE Costa hateten.
Relasiona ko kazu ne’e, nia dehan, SEPFOPE sei halo reverifikasaun, e agora hotu ona no dadaun ne’e sira simu ona osan.
“Sentru formasaun Tibar $250 mil, Comoro $72,000, Bairo-Pite $203 mil, Camea $24 mil no Sentru Formasaun Manatuto $20,000,” nia hateten.