Estensionista Distritu Ermera Ejiji Transporte

Estensionista sira iha distritu Ermera ejiji ba Ministeriu Agrikultura e Peskas (MAP) atu kria kondisoens, liu –liu transporte hodi fasilita sira nia servisu apoiu komunidade iha nivel sukus.

Estensionista, Maria Marques Soares, hateten antes ne’e MAP promete ona atu fasilita transporte ba sira atu hala’o servisu, maibe to’o agora laiha.

Nia haktuir, distritu Ermera iha sukus 50 resin, maibe estensionista iha deit 31 no kada ema ida kobre suku tolu ou hat.

“Ami presiza transporte atu kobre suku hirak ne’e, e ami rona katak motor iha ona, maibe to’o agora seidauk to’o mai iha ami,” Marques kestiona, iha Ermera. 

Nia esplika, katak estensionista sira nia papel atu apoiu grupo agrikultura no hortikultura, hanesan kuda modo, batar ho sistema modernu hodi hasa’e produsaun iha rai laran. 

Iha parte seluk, Xefe Suku Lemia leten, Jose Araujo, husu ba governante sira atu fo atensaun ba iha servisu estensionista sira, tanba estensionista ida kobre suku rua to’o tolu ho area distansia ne’ebe luan presiza apoiu.  

“Kria kondisaun ne’ebe dignu ba iha estensionista sira, tanba sira servisu barak liu kompara ho ema sira ne’ebe uja kareta no motor,”Xefe suku Araujo dehan. 

Entretantu Membru Komisaun D (ekonomia e dezenvolvementu), Deputada Brigida Antonia Correia, hateten estensionista balun simu ona, maibe balun mos seidauk.