- Publika iha: 03 Julho 2014
Antes realize programa pilotu to’os komunidade iha distritu Ermera, organizasaun Hamutuk Ita Ajuda Malu (HIAM) Health organiza wokshop hodi rona ideias no sujestaun husi lideransa local sira no estensionista kona ba asuntu ne’e.
Diretora HIAM Health (HH), Rosaria Martins da Cruz, hateten involveimentu lideransa sukus no extensionista ne’e importante tebes, nune’e programa ne’e bele benefisia ba komunidade sira, ne’ebe kontribui mos ba iha prevensaun malnutrisaun.
“Ami bele servisu hamutuk ho sira hodi haburas nutrisaun no hadia moris komunidade liu husi implementasaun to’os komunidade ne’e,” Diretora HH ne’e hateten, iha Ermera.
Nudar implementador, nia dehan, HH prontu apoiu formasaun no ekipamentus inklui mos viveirus ba grupo sira.
Durante diskusaun diretora ne’e mos husu ba lideransa sukus sira, atu bele organiza grupos no identifika rai ne’ebe laiha problema no bee, nune’e programa ne’e bele benefisia ba membru grupo hotu.
Projetu pilotu ne’e finansia husi Sunrise Joint Venture ho montante $120,000 durante tinan ida ne’ebe sei benefisia ba grupo hamutuk 12 iha distritu Ermera.
Nia hatutan, programa hanesan implementa ona iha distritu hitu; hanesan distritu Liquisa, Ermera, Manatuto, Baucau, Viqueque, Aileu inklui Dili, ho total grupo hamutuk 31.
Nia dehan, grupo balun hetan susesu to’o agora no balun mos la’e, tanba membrus laiha kontribuisaun ne’ebe diak.
Iha fatin hanesan Xefe Sukus Lemia Leten, Jose Araujo, agradese tebes ba HIAM Health ne’ebe hili distritu Ermera ba projeitu pilotu ida ne’e no prontu atu apoiu programa ida ne’e, tanba bele hadia nutrisaun uma laran no ekonomia familia nian.
“Maibe see mak sosa, serra que komunidade sira produs bar-barak depois estraga deit,” nia preokupa.
Lideransa sukus ne’e mos husu HIAM Health, atu apoia estensionistas, eduka komunidade sira hodi proteje labarik sira husi malnutrisaun, tanba labarik mak futuru ba nasaun.
Entretantu, Emprezario Peter Dougan, prontu atu servisu hamutuk ho grupo hortikultura sira hodi distribui produsaun ne’ebe grupo sira iha ba supermerkadu sira.
“Agora hau servisu ho imi iha Ermera, iha fulan Agostu, hau sei sosa kareta pulbox ida hodi halo distribuisaun produsaun sira ba iha merkadu sira iha kapital,” Manager Kompania Farm Pro Lda ne’e hateten.