- Publika iha: 11 Junho 2014
Vise Ministra Saude asuntu jestaun apoiu e rekursus, Maria do Céu Sarmento Pina da Costa, hateten Ministerio Saude iha dividas $700 mil resin mak seidauk selu.
Nia dehan, dividas hirak ne’e mosu tanba ezekusaun OJE 2013 taka iha fulan Novembru nia laran, entaun pagamentu ne’ebe la konsege tenke reapropria fali ba tinan ida no tinan ne’e mak foin bele selu.
Alende ne’e, nia dehan, iha mos dividas husi kompania sira liu –liu manutensaun kareta no Timor –Telekom ne’ebe desde tinan 2008 to’o 2012 seidauk selu, no tinan ne’e halo nia prosesu pagamentu.
“Maibe dividas balun ami labele halo prosesu pagamentu, tanba dividas sira ne’e tinan anteriores 2008 to’o agora dokumentus balun la kompletu, hanesan kompania balun la hatama taxa, dividas ne’e mate, lisensa komersio la los, balun hatama invoice dobru,” Vise Ministra Saude ne’e hateten, bainhira aprezenta relatorio ezekusaun OJE 2014, iha Parlamentu Nasional.
Nia hatutan, dividas sira ne’e kompostu husi, dividas manutensaun jeradores, AC, kareta, pagamentu ba ATK, Kombustivel, kustu balun tenke selu ba ospital sira halo transferensia moras ba liur inklui mos salariu balun ne’ebe la konsege selu tanba failhasu iha administrasaun.
Nia informa, dividas tinan kotuk ho montante $55 mil resin liu –liu ba transferensia pasiente seidauk halo pagamentu kompletu, tanba ospital sira hatama invoice tarde.
Iha fatin hanesan, Deputada Benvinda Catarina Rodrigues, husu ba Ministerio Saude atu resolve lalais dividas sira ho ospital sira iha liur hanesan ospital Sutomo-Surabaya no Sangla-Bali.
“Se la’e fo impaktu ba atendementu ita nia pasiente ne’ebe transfere ba iha ne’eba,” nia dehan.
Preokupasaun ne’ebe hanesan mai husi Deputada Florentina Smith, husu atu halo verifikasaun ida klean ba dividas sira ne’e hodi resolve lalais ,tanba iha dividas balun kleur liu ona.