- Publika iha: 03 Junho 2014
Membru Parlamentu husu ba Ministeriu Obras Publiku (MOP) atu hadia moru protesaun estrada ne’ebe ameasa atu monu iha suku Gisu, sub-distritu Loes, distritu Liquisa.
Deputada Benvinda Catarina Rodrigues, hateten iha governasaun governu Aliansa Maioria Parlamentar (AMP) ekipa obras publiku tun halo ona ponte Loes no kompleta kedas ho moru de protesaun, maibe moru ne’e halo la to’o hotu no laiha kualidade nune’e atu besik naksobu.
“Sei ida ne’e maka la hadia, mota bele mai afeita halo estraga kantor polisia ne’ebe iha Lo’es ne’e, nomos kantor agrikultura nian,” dehan Deputada Benvinda Catarina Rodrigues.
Tanba ne’e, nia husu ba Ministeriu Obras Publik atu tun direitamente hodi hare kondisaun iha baze.
“Foin lalais hau ba iha ne’eba ita nia populasaun lamenta tebes,” nia hateten.
Hatan ba preokupasaun ne’e Ministru Obras Publik (MOP), Gastao de Sousa, hateten iha tempu badak sira nia ekipa sei ba haree direitamente iha fatin ne’eba.
“Ami nia teknika sira sei ba haree no sei foti medida ba asuntu ne’e,” Ministru hateten.