- Publika iha: 03 Junho 2014
Membru Parlamentu husu ba Ministeru Obras Publiku (MOP) atu rehabilita tiha estrada iha Bebonuk, Dili, tanba estrada ne’e sai mos hanesan dalan alternative wainhira iha eventu bo’ot ruma hala’o iha Dili laran.
Deputada Benvinda Catarina Rodrigues, hateten estrada Bebonuk ne’e at kleur ona no bebeik ona levanta iha plenaria Parlamentu Nasional, maibe to’o agora laiha rezultadu.
“Ita koalia bebeik ona, maibe kondisaun mak hanesan ne’e hela deit, laiha mundansa,” Deputada Rodrigues kestiona, iha Parlamentu Nasional.
Nia kestiona estrada ne’e, tanba bainhira hala’o eventu bo’ot ruma iha Dili laran, estrada ne’e sai alternative ida hodi kareta sira bele liu husi ne’eba.
“Bainhira dalan protokulu bainaka sira husi rai liur uja, konserteza kareta hotu halai iha estrada ne’e,” nia dehan.
Entretantu Ministeriu Obra Publiku, Gastao de Souza, rekonese katak iha duni rekomendasaun husi Parlamentu Nasional atu hadia estrada ne’e, maibe presiza tempu.
Ministru Souza, hateten iha aprovasaun Orsamentu Jeral Estadu 2014 foin lalais ne’e, MOP kompleta ho fundus ba kapital dezenvolvementu hamutuk $30,664 miloens.
“Osan refere bele ajuda rehabilita tiha estrada ne’e,” Ministru Souza hateten.